ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އަށް އައްޔަނުކުރުމަށް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރައްޔިތުންގެ މަޖިލީހަށް ފޮނުއްވައިފައިވާ ނަން، އީސީގެ ކުރީގެ ނައިބު ރައީސް އިސްމާއީލް ހަބީބާ ގުޅޭ ޝަކުވާއެއް އޮތްނަމަ އެ ޝަކުވާއެއް ހުށަހެޅުމަށް މަޖިލީހުން ހުޅުވާލައިފިއެވެ.

އެކަމާއި ގުޅޭގޮތުން މަޖިލީހުގެ އިދާރާއިން ނެރެފައިވާ ބަޔާނެއްގައި ވަނީ ގާނޫނުގައި ވާގޮތުން އެޗްއާރުސީއެމްއަށް މެމްބަރަކު އައްޔަން ކުރުމަށް ރައީސް ފޮނުއްވާފައިވާ ނަން ދިރާސާކުރަން މަޖިލީހުގެ ކޮމިޓީއަށް މިހާރު ފޮނުވާފައި ވާކަމަށެވެ.

އެހެންކަމުން ހަބީބު އާ ގުޅޭ އެއްވެސް ޝަކުވާއެއް އޮތް ނަމަ މިމަހުގެ 28 ވާ އާދީތަ ދުވަހުގެ 14:00ގެ ކުރިން ޝަކުވާ ހުށަހަޅާ ފަރާތުގެ ފުރިހަމަ ނަމާއި ދާއިމީ އެޑްރެސް އަދި ގުޅޭނެ ފޯނު ނަންބަރު އެނގޭނެ ގޮތަށް ކޮމެޓީގެ އީމެއިލް އެޑްރެސް [email protected] އަށް ނުވަތަ މަޖިލީސް އިދާރާއަށް ލިޔުމަކުން ފޮނުވުމަށް އެ އިދާރާއިން ވަނީ އެދިފައެވެ.

އެޗްއާރްސީއެމްގެ މެންބަރު ކަމަށް މިދިޔަ ޖޫން މަހު ހުޅުވާލީ އެ ކޮމިޝަންގެ މެންބަރެއްގެ ގޮތުގައި ހުންނެވި ޑރ. އަހުމަދު އަދުހަމް އަބްދުﷲ މިދިޔަ އަހަރުގެ އޮކްޓޫބަރު މަހުގެ ތެރޭގައި މަގާމުން އިސްތިއުފާ ދެއްވުމާ ގުޅިގެންނެވެ.

ހަބީބަކީ އިލެކްޝަންސް ކޮމިޝަން (އީސީ) ގައި 21 އަހަރު މަސައްކަތްކުރައްވާފައިވާ ބޭފުޅެކެވެ. އެކޮމިޝަންގެ މެމްބަރުކަމާއި ނައިބު ރައީސްކަން ހަބީބު ކުރައްވާފައިވެއެވެ.