ރާއްޖޭގައި ޤާއިމުކުރާ ޑޮވެލޮޕްމަންޓް ބޭންކް ހުޅުވަން ތައްޔާރުކުރެވޭ ޢިމާރާތުގެ މަސައްކަތް ކުރިއަށްދާގޮތް މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދު މިއަދު ބައްލަވާލައްވައިފިއެވެ.
ޑިވެލޮޕްމަންޓް ބޭންކެއް ރާއްޖޭގައި ޤާއިމު ކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މިހާރު އެ ބޭންކަށް ސީއީއޯއަކާއި ޗެއަރމަންއެއްވެސް ވަނީ ހަމަޖައްސަވާފައެވެ.
އެގޮތުން އެ ދެމަޤާމަށްވެސް ހަމަޖައްސަވާފައިވަނީ ދުނިޔޭގެ އެކި ތަންތަނުގައި އެފަދަ މަސައްކަތްތައް ކުރައްވާފައިވާ ވަރަށްގިނަ ދުވަހުގެ ތަޖުރިބާވެސް ލިބިވަޑައިގެން ތިއްބެވި ދެބޭފުޅުންކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
މޯލްޑިވްސް ޑިވެލޮޕްމަންޓް ބޭންކް ހުޅުވުމުން ރާއްޖޭގެ އިޤްތިޞާދު ސިންދަފާތުކޮށް ކުރިއަށް ގެނދިއުމަށްޓަކައި ސަރުކާރުން ކަނޑައަޅުއްވާފައިވާ އެންމެމުހިންމު އެއް ވަޢުދެވެ. މި ބޭންކު ހުޅުވައި ޚިދުމަތް ދޭން ފެށުމަކީ ރާއްޖޭގެ ފަތުރުވެރިކަމުގެ ދާއިރާއާއި، ހަކަތައިގެ ދާއިރާ، އަދި ބިނާވެށީގެ ދާއިރާގެ އިތުރުން ތަރައްޤީގެ އެހެނިހެން ދާއިރާތަކުންވެސް ރާއްޖޭގައި އިންވެސްޓް ކުރައްވާ ފަރާތްތަކަށް ހަބެއްގެ ގޮތުގައި ބޭނުންކުރެވޭނެ މުހިންމު ބެންކަކަށްވެ، އެކަމުގެ ސަބަބުން ރާއްޖެއަށް ވަރަށްބޮޑު ކުރިއެރުމެއް ލިބޭނެކަމަށް ރައީސުލްޖުމްހޫރިއްޔާވަނީ ވިދާޅުވެފައެވެ.
ސަރުކާރުގެ އަމާޒަކީ މިއަހަރުގެ ތެރޭގައި މި ބޭންކު ހުޅުވައި ޚިދުމަތްދޭން ފެށުމެވެ.
