ސަރުކާރުގެ އިސްވެރިޔަކަށް ސިހުރު ހެދިކަމުގެ ތުހުމަތުގައި ހައްޔަރު ކުރި އެންވަޔަރަމަންޓް މިނިސްޓްރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ އާއި އޭނާގެ ކޮއްކޮ ދޫކޮށްލައިފިއެވެ.

ސިހުރު ހެދިކަމުގެ ތުހުމަތުގައި ޖުލައި 23 ވަނަ ދުވަހު 3 މީހަކު ހައްޔަރުކޮށްފައިވެއެވެ. ހައްޔަރު ކުރެވުނު މީހުންގެ ތެރޭގައި އެންވަޔަރަމަންޓް މިނިސްޓްރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ އާއި އޭނާގެ ކޮއްކޮ އެންވަޔަރަމަންޓް މިނިސްޓްރީގެ ސީނިއާ ޕޮލިޓިކަލް ޑިރެކްޓަރު ސަނާ ހިމެނެއެވެ. 

 އެމައްސަލައާއި ގުޅިގެން ފުލުހުން ވިދާޅުވީ ޖޫން 23 ވަނަ ދުވަހު ފުލުހުން ތަހުގީގު ކުރަން ފެށި މައްސަލައާއި ގުޅިގެން ހައްޔަރު ކުރި 40 އަހަރުގެ އަންހެން މީހާއާއި 26 އަހަރުގެ އަންހެން މީހާ އިތުރަށް ބަންދުގައި ބަހައްޓަން ނުފެންނާތީ ދޫކޮށްލާފައިވާ ކަމަށެވެ. އަދި މި މައްސަލައިގައި ހައްޔަރު ކުރި ފިރިހެން މީހާ މި މަހު 1 ވަނަ ދުވަހު ދޫކޮށްލާފައިވާކަމަށްވެސް ފުލުހުން ވިދާޅުވިއެވެ. 

މި މައްސަލައިގައި ހައްޔަރު ކޮށްފައިވާ މީހުން ދޫކޮށްލާފައިވަނީ ކޯޓުން ބަންދަށް ޖެހި މުއްދަތް ހަމަވުމުންނެވެ. އެގޮތުން ކޯޓުން ހައްޔަރު ކުރި މީހުންނަށް ފުރަތަމަ ބަންދަށް ޖަހާފައިވަނީ ހަތް ދުވަހެއެވެ. އަދި އޭގެ ފަހުން ބަންދު އިތުރުވެސް ކޮށްފައިވެއެވެ. 

މީގެ އިތުރުން ފުލުހުން ވިދާޅުވީ މި މައްސަލައިގެ ތުހުމަތުގައި ހައްޔަރު ކުރެވުނު މީހުން ހައްޔަރުން ދޫކުރިނަމަވެސް މައްސަލައިގެ ތަހުޤީގު ކުރިޔަށް ގެންދާނެ ކަމަށެވެ.