އިންޑިއާގެ ބެންގަލޫރޫގައި ހުންނަ އެންޔޫ ހޮސްޕިޓަލް އިން ފަރުވާ ހޯއްދަވަމުންދާ ދިވެހިންނާއި ދިވެހިރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު އިބްރާހީމް ޝަހީބު އިއްޔެ ބައްދަލުކުރައްވައި ހާލުބައްލަވާލައްވައިފިއެވެ.
އިއްޔެ ހެނދުނު އެ ހޮސްޕިޓަލްއަށް ކުރެއްވި ޒިޔާރަތުގައި، ސަފީރު ވަނީ އެ ހޮސްޕިޓަލްގައި އެޑްމިޓްކޮށްފައިވާ ދިވެހިންގެ އިތުރުން އެ ހޮސްޕިޓަލްއަށް ފަރުވާ ހޯއްދެވުމަށް އިއްޔެ ވަޑައިގެން ތިއްބެވި ދިވެހިންނާވެސް ބައްދަލުކުރައްވާފައެވެ.
ސަފީރު އެންޔޫ ހޮސްޕިޓަލަށް ޒިޔާރަތް ކުރެއްވީ، އެހޮސްޕިޓަލްގެ އިސް ބޭފުޅުންނާ ބައްދަލުކުރައްވައި، އެ ހޮސްޕިޓަލްއިން ފޯރުކޮށްދެމުންދާ ހިދުމަތްތައް ބައްލަވާލެއްވުމަށެވެ.
އެންޔޫ ހޮސްޕިޓަލަކީ ދިވެހިން އެންމެ ގިނައިން އޯގަން ޓްރާންސްޕްލާންޓް ހެއްދެވުމަށް ޒިޔާރަތް ކުރާ ހޮސްޕިޓަލްއެވެ. މިގޮތުން މިއަހަރުގެ މިހާތަނަށް މި ހޮސްޕިޓަލުން 9 ދިވެހިން ވަނީ އޯގަން ޓްރާންސްޕްލާން ހައްދަވާފައެވެ.
