ނެޝަނަލް ސިންގަލް ވިންޑޯ "ޓްރޭޑިއަން" އިފްތިތާހުކުރުމަށް ހޮޓެލް ޖެންގައި ބޭއްވި ޚާއްސަ ރަސްމިއްޔާތުގައި ޓްރޭޑު ނެޓުގެ މެނޭޖިންގ ޑިރެކްޓަރ ސަޢީދާ އުމަރު ވިދާޅުވީ ޓްރޭޑިއަން ރަސްމީކޮށް ބޭނުންކުރަން ފަށާނީ ނޮވެމްބަރުމަހުގެ އެއްވަނަ ދުވަހުން ފެށިގެން ކަމުގައެވެ.
ޓްރޭޑް ނެޓުގެ މެނޭޖިންގ ޑިރެކްޓަރ ސަޢީދާ އުމަރު ވިދާޅުވީ މިއީ ވިޔަފާރިވެރިންނަށް ފަހި މާހައުލެއް ގާއިމްކޮށްދިނުމަށް ސަރުކާރުން ކުރައްވާ މަސައްކަތުގެ މުހިއްމު ބައެއް ކަމަށެވެ. އަދި މިހާރު އިފްތިތާހުކޮށްފައިވަނީ ސިންގަލް ވިންޑޯގެ ފުރަތަމަ ފިޔަވަހީގެ ޚިދުމަތްތައްކަމަށާއި މުޅި ސިސްޓަމް އަންނަ އަހަރުގެ ފުރަތަމަ ކުއާޓަރގައި ބޭނުންކުރަން ފެށޭނެ ކަމަށެވެ. އަދި މިފަދަ ބޮޑު ބަދަލެއް ވިޔަފާރީގެ މާހައުލަށް އަންނައިރު، އެކަމަށް ބޭނުންވާ ތަމްރީންތަކާއި ވަގުތު ވިޔަފާރިތަކަށް ދިނުމަކީ މި މަސައްކަތުގެ މުހިންމު ބައެއް ކަމުގައި ފާހަގަކުރެއްވިއެވެ.
ޓްރޭޑިއަންގެ މަސައްކަތް ކޮށްފައިވަނީ އޭޝިއަން ޑިވެލޮޕްމަންޓު ބޭންކުގެ އެހީތެރިކަމާއެކު ކްރިމްސަން ލޮޖިކާއި ހަވާލުކޮށްގެންނެވެ. މި ޕްރޮޖެކްޓަކީ އިޤްތިޞާދީ ތަރައްޤީއާ ވިޔަފާރިއާ ބެހޭ ވުޒާރާއާއި ޓްރޭޑް ނެޓް މޯލްޑިވްސް ގުޅިގެން ކުރިއަށްގެންދާ މަސައްކަތެކެވެ.
މި ޕްރޮޖެކްޓަކީ ދިވެހި ވިޔަފާރިވެރިންނަށް ލުއި ގޮތްތަކެއް މަގުފަހިކޮށްދެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެންގުޅުއްވާ ތަޞައްވުރުގެ ދަށުން، ކުރިއަށްގެންދިޔަ ވަރަށް މުހިންމު މަސައްކަތެކެވެ. މިއީ ވިޔަފާރީގެ ބޭނުންތަކަށް އެކި އިދާރާތަކުން ހޯދަމުން އައި ޚިދުމަތްތައް، އޮންލައިންކޮށް އެއް ޕްލެޓްފޯމެއްގެ ތެރެއިން ހޯދޭނެގޮތަށް ބަދަލުކޮށް، ވިޔަފާރިވެރިންނަށް ދިމާވަމުންދާ ދަތިތަކަށް ބޮޑު ލުޔެއް ގެންނާނެ ޚިދުމަތެކެވެ.
