ޤައުމީ ސަރަހައްދުން ބޭރުގައިވާ ބައޯޑައިވަރސިޓީ ރައްކާތެރިކުރުމަށް އެކުލަވާލެވިފައިވާ "ހައި ސީސް ޓްރީޓީ" ގައި ރާއްޖެއިން ސޮއިކޮށްފިއެވެ.
މި މުހިންމު މުއާހަދާގައި ރާއްޖެއިން ސޮއިކުރުމާ ގުޅިގެން، މި އަހަރުގެ ސެޕްޓެމްބަރު މަހު އދ. ގެ އާންމު މަޖިލީހުގައި މި މުއާހަދާ ތަސްދީގު ކުރުމަށް ރާއްޖެއިން ގަސްދުކުރާކަން ސަރުކާރުން ހާމަކޮށްފައިވެއެވެ.
ހައި ސީސް ޓްރީޓީއަކީ ޤައުމުތަކުގެ ކަނޑުގެ ސަރަހައްދުން ބޭރުގައިވާ ސަމުދުރުގެ ދިރުންތަކާއި ވަސީލަތްތައް ރައްކާތެރިކޮށް، ދެމެހެއްޓެނިވި ގޮތެއްގައި ބޭނުންކުރުމަށް އެކުލަވާލެވިފައިވާ ބައިނަލްއަޤްވާމީ މުއާހަދާއެކެވެ. މި މުއާހަދާގައި ސޮއިކުރުމުން، ކަނޑުގެ ދިރުންތައް ހިމާޔަތްކުރުމަށާއި މޫސުމަށް އަންނަ ބަދަލުތަކާ ކުރިމަތިލުމަށް ރާއްޖެއިން ކުރަމުންދާ މަސައްކަތްތައް އިތުރަށް ހަރުދަނާވެގެންދާނެއެވެ.
ރާއްޖެއިން މި މުއާހަދާގައި ސޮއިކޮށް، ތަސްދީގު ކުރުމަށް ނިންމުމަކީ ތިމާވެށި ރައްކާތެރިކުރުމަށް ރާއްޖެއިން ދޭ އަހައްމިއްޔަތުކަން ދައްކުވައިދޭ ކަމެކެވެ. އަދި މިކަމަކީ ބައިނަލްއަޤްވާމީ މުޖުތަމައުގައި ރާއްޖޭގެ ދައުރު އިތުރަށް ފުޅާވެގެންދާނެ ކަމެއްކަމަށްވެސް ބެލެވެއެވެ.
