މިފްކޯއިން މަސް ގަންނަ އަގު 20 ރުފިޔާ އަށް ބޮޑުކޮށްފި
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސް ގަންނަ އަގުތަކަށް ބަދަލު ގެނެސް، މިއަދުން ފެށިގެން އަމަލުކުރަން ފަށާނެ އާ އަގުތައް އެ ކުންފުނިން އާންމުކޮށްފިއެވެ.
9 ޖޫން އިން ފެށިގެން އަމަލުކުރަން ހަމަޖެހިފައިވާ މި އަގުތަކަށް ބަލާއިރު، މަހުގެ ބާވަތްތަކާއި ބަރުދަނަށް ބަލައި ތަފާތު އަގުތަކެއް ވަނީ ކަނޑައަޅާފައެވެ.
މިފްކޯއިން އާންމުކޮށްފައިވާ ތާވަލުގައިވާ ގޮތުން، ކަޅުބިލަ މަހާއި ބޮޑު ކަންނެލީގެ ތެރެއިން 15 ކިލޯއިން މަތީގެ މަސް ކިލޯއެއް ގަންނާނީ 25 ރުފިޔާއަށެވެ. އަދި 15 ކިލޯއަށްވުރެ ކުދި މަސް ކިލޯއެއް ގަންނާނީ 20 ރުފިޔާއަށެވެ.ޚ
މި އަގުތަކަކީ މިފްކޯގެ އެކި ސަރަހައްދުތަކުގައި ހުރި ފެސިލިޓީތަކަށް މަސް ގަންނާނެ އަގުތަކެވެ. މީގެ ތެރޭގައި ކޫއްޑޫ ފިޝަރީޒް ކޮމްޕްލެކްސް، ފެލިވަރު ފިޝަރީޒް ކޮމްޕްލެކްސް، ކަނޑުއޮތްގިރި ފިޝަރީޒް ކޮމްޕްލެކްސްގެ އިތުރުން އައްޑޫ ފިޝަރީޒް ކޮމްޕްލެކްސް ހިމެނެއެވެ. އަދި މިފްކޯގެ މަސް ގަންނަ ބޯޓުފަހަރުތަކަށް މަސް ކިރާއިރުވެސް އަމަލުކުރާނީ މި އަގުތަކަށެވެ.
މީގެ އިތުރުން ގދ. ތިނަދޫ، ގދ. ފަރެސްމާތޮޑާ، ގއ. ދާންދޫ އަދި ފުވައްމުލައް ބަނދަރުން ވެސް މި އަގުތަކުގައި މަސް ގަންނާނެއެވެ.
މިފްކޯއިން މަސް ގަންނަ އަގުތަކަށް މި ގެނައި ބަދަލާއެކު، ހުރިހާ ސަރަހައްދެއްގައިވެސް މަސް ގަންނަ އަގުތައް ވަނީ އެއްހަމަކޮށްފައެވެ. މީގެ ކުރިންވެސް މިފްކޯއިން ދަނީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލުތަކާ ގުޅިގެން، ރާއްޖޭގެ މަސްވެރިންގެ އަތުން މަސް ގަންނަ އަގުތަކަށް ދޭތެރެ ދޭތެރެއިން ބަދަލު ގެންނަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
