ފަސްޓް ގްލޯބަލް ޗެލެންޖުގައި ވާދަކުރާ ޣިޔާސުއްދީން ސްކޫލްގެ ދަރިވަރުންނާ ސަފީރު ޝަހީބް ބައްދަލުކުރައްވައިފި

ގްރީސްގެ ވެރިރަށް އެތެންސްގައި ބޭއްވުމަށް ހަމަޖެހިފައިވާ ފަސްޓް ގްލޯބަލް ޗެލެންޖު ރޮބޮޓިކްސް މުބާރާތުގައި ވާދަކުރާ ޣިޔާސުއްދީން ސްކޫލްގެ ދަރިވަރުންންނާ ރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު އިބްރާހީމް ޝަހީބު ބައްދަލުކުރައްވައިފިއެވެ.

ގްރީސް އަށް ދަތުރުކުރުމަށްޓަކައި ބޭނުންވާ ގްރީސް ވީސާ ނެގުމަށް އިންޑިއާގެ ވެރިރަށް ނިއުދިއްލީއަށް އައިސްއުޅޭ މިޓީމާއި ސަފީރު ބައްދަލުކުރައްވާފައިވަނީ މިއަދު ހަވީރު ދިވެހިރާއްޖޭގެ ހައިކޮމިޝަންގައެވެ.

މި ބައްދަލުވުމުގައި މި މުބާރާތުގައި ވާދަކުރާ ދިވެހި ދަރިވަރުންނާއި އެ ކުދިންގެ ބެލެނިވެރިން ބައިވެރިވިއެވެ. ވިސާގެ ކަންކަން އަވަސް ކުރުމުގައި ހައިކޮމިޝަންގެ ފަރާތުން ވެދެވެން އޮތް އެހީތެރިކަމެއް ދެއްވާނެކަމުގެ ޔަގީންކަން ސަފީރު ދެއްވިއެވެ.

އަދި އޭގެއިތުރުން ދަރިވަރުންނާ މުހާތަބު ކުރައްވަމުން، ރޮބޮޓިކްސްއަކީ މުސްތަޤްބަލް އޮތް ދާއިރާއެއް ކަމާއި އެކުދިން ސްކޫލްގައި ކިޔަވަމުންދާ ރޮބޮޓިކްސް މާއްދާއިން އުގެނިފައިވާ އެއްޗެއްގެ ބޭނުން ހިފައި މިމުބާރާތުގައި ރާއްޖެއަށް ރީތީނަން ހޯދައިދެވޭނެ ކަމަށް ޤަބޫލް ކުރައްވާކަމަށް ވިދާޅުވިއެވެ.

މި ބައްދަލުވުމުގައި ދިވެހި ދަރިވަރުންނާއި ބެލެނިވެރިން ވަނީ ފަސްޓް ގްލޯބަލް ޗެލެންޖު މުބާރާތާ ބެހޭ ތަފްސީލު ސަފީރާއި މިޝަންގެ އެހެން ސްޓާފުންނާ ހިއްސާ ކުރައްވާފައެވެ. މި ބައްދަލުވުމުގައި ސަފީރުގެ އިތުރުން މިޝަންގެ ސްޓާފުން ބައިވެރިވިއެވެ.

ނިއުދިއްލީގައި ހުންނަ ދިވެހިރާއްޖޭގެ ހައިކޮމިޝަނުން ދަނީ، މި މުބާރާތުގައި ރާއްޖޭގެ ފަރާތުން ބައިވެރިވާ ޓީމުގައި ހިމެނޭ ޣިޔާސުއްދީން ސްކޫލްގެ ދަރިވަމުންނާއި އެކުގައި ދަތުރުކުރާ އޮފިޝަލުންނާއި އަދި ބެލެނިވެރިންގެ ވިސާ ނެގުމުގެ ކަންތައްތަކުގައި އެހީތެރިކަން ފޯރުކޮށްދެމުންނެވެ.