ކުރިޔަށް އޮތް ފަސް ދުވަހު ވެސް މޫސުން ގޯސްވާނެ: މެޓް

ރާއްޖޭގެ އެކި ހިސާބުތަކަށް ހުޅަނގު މޫސުމުގެ ބާރުގަދަވެ، ކުރިޔަށް އޮތް ފަސް ދުވަހު މޫސުން ގޯސްވާނެކަމަށް، މޫސުމާ ބެހޭ ޤައުމީ އިދާރާ، މެޓްއިން ބުނެފިއެވެ.

މެޓްއިން ބުނީ މާދަމާއިން ފެށިގެން މި މަހުގެ 17ގެ ނިޔަލަށް، ރާއްޖޭގެ ހުރިހާ ސަރަހައްދަކަށް މޫސުން ގޯސްވާނެކަމަށެވެ.

ޚާއްސަގޮތެއްގައި ދެކުނާއި މެދުރާއްޖެތެރެއަށް ވައި ބާރުވުމާއެކު، ކަނޑު ގަދަވެ، ވިއްސާރަކުރާނެކަމަށް ލަފާކުރެވޭތީ އެކަމަށް ސަމާލުވުމަށް ވަނީ އިލްތިމާސްކޮށްފައެވެ. މެޓްއިން ވަނީ ދެކުނާއި މެދުރާއްޖެތެރެއަށް މިއަދު މެންދުރުފަހު 02:30 އިން ފެށިގެން ރޭގަނޑު 20:30 ހަމައަށް ހުދު ސަމާލުވެސް ނެރިފައެވެ،   

މޫސުމާ ބެހޭ ޤައުމީ އިދާރާއިން ވަނީ ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހި، ކަނޑުތައް ގަދަވާނެ ކަމަށް ލަފާކޮށްފައެވެ. 

ވައިގަދަވެ، ކަނޑުތައް ގަދަވާނެތީ ކަނޑު ދަތުރުފަތުރުކުރާ ފަރާތްތަކުން ސަމާލުވުމަށް މޫސުމާ ބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ