ޔޫއެންގެ އިގްތިސާދީ އަދި މާލީ ކޮމިޓީގެ ނައިބު މުގައްރިރުކަމަށް ދިވެއްސަކު އިންތިޚާބުވެއްޖެ

އެކުވެރި ދައުލަތްތަކުގެ ޖަމްއިއްޔާ (ޔުނައިޓެޑް ނޭޝަންސް) ގެ އާންމު މަޖިލީހުގެ ދެވަނަ ކޮމިޓީ (އިގްތިސާދީ އަދި މާލީ ކޮމިޓީ) ގެ ނައިބު މުގައްރިރުގެ މަގާމަށް ދިވެހި ޑިޕްލޮމެޓެއް ކަމަށްވާ ހުސައިން އަޒްހާން އިންތިޚާބުވެއްޖެއެވެ.

ހުސައިން އަޒްހާން މި މަގާމަށް އިންތިޚާބުވެފައިވަނީ އދ. ގެ އާންމު މަޖިލީހުގައި މިއަދު ނެގުނު ވޯޓަކުންނެވެ. އަޒްހާން އަކީ އދ. އަށް ކަނޑައަޅާފައި ހުންނަ ރާއްޖޭގެ ދާއިމީ މިޝަންގެ ސެކަންޑް ސެކްރެޓަރީގެ މަގާމު ފުރުއްވަމުން ގެންދަވާ ބޭފުޅެކެވެ.

މި ކާމިޔާބީއާ ގުޅިގެން އދ. އަށް ކަނޑައަޅުއްވާފައި ހުންނަވާ ރާއްޖޭގެ ދާއިމީ މަންދޫބު ޑރ. އަލީ ނަސީރު މުހައްމަދު ވަނީ އަޒްހާންއަށް މަރުހަބާ ވިދާޅުވެ އެކްސްގައި ޕޯސްޓެއް ކުރައްވާފައެވެ. ޑރ. އަލީ ނަސީރު ވިދާޅުވީ، މިއީ އަޒްހާންގެ ފަންނީ ގާބިލުކަން ހާމަކޮށްދޭ ކަމެއްގެ އިތުރުން، އދ. ގައި ރާއްޖޭގެ ލީޑަޝިޕަށް އޮތް އިތުބާރު ރަމްޒުކޮށްދޭ ކަމެއް ކަމަށެވެ.

އދ. ގެ ދެވަނަ ކޮމިޓީއަކީ އިގްތިސާދީ ކުރިއެރުމާއި، ދެމެހެއްޓެނިވި ތަރައްގީއާއި، ދުނިޔޭގެ މާލީ ކަންކަމާ ގުޅޭ މުހިންމު ނިންމުންތައް ނިންމާ ކޮމިޓީއެކެވެ. ރާއްޖޭގެ ފަރާތުން މިފަދަ މުހިންމު މަގާމެއް ފުރުއްވުމަކީ ބައިނަލްއަގުވާމީ މައިދާނުގައި ރާއްޖޭގެ ދައުރު ފުޅާވެ، ރާއްޖޭގެ އަޑު އިތުރަށް ގަދަވެގެންދާނެ ކަމެކެވެ.

ޑރ. އަލީ ނަސީރު މުހައްމަދަކީ މީގެ ކުރިން އެމެރިކާއަށް ކަނޑައަޅުއްވާފައި ހުންނެވި ސަފީރުގެ އިތުރުން، ކުދި ޖަޒީރާ ގައުމުތަކުގެ އިއްތިހާދު (އެއޯސިސް) ގެ ޗެއާކަންވެސް ކުރައްވާފައިވާ ތަޖުރިބާކާރު ޑިޕްލޮމެޓެކެވެ.