މޯލްޑިވްސް އިސްލާމިކް ބޭންކައަށް 2025 ވަނަ އަހަރު ސާފު ފައިދާގެ ގޮތުގައި 370.7 މިލިއަން ރުފިޔާ ލިބިއްޖެ
މޯލްޑިވްސް އިސްލާމިކް ބޭންކް (އެމްއައިބީ) އަށް 2025 ވަނަ އަހަރު ސާފު ފައިދާގެ ގޮތުގައި 370.7 މިލިއަން ރުފިޔާ ލިބިއްޖެއެވެ.
މިއީ 2024 ވަނަ އަހަރު އެ ބޭންކަށް ސާފު ފައިދާގެ ގޮތުގައި ލިބުނު 277.9 މިލިއަން ރުފިޔާއާ އަޅާބަލާއިރު 33 އިންސައްތައިގެ ކުރިއެރުމެކެވެ. އެ ބޭންކުން އާންމުކޮށްފައިވާ 2025 ވަނަ އަހަރުގެ މާލީ ބަޔާންތަކުން ދައްކާގޮތުގައި، ޓެކްސްއަށް ކަނޑައެޅުމުގެ ކުރިން ބޭންކަށް ފައިދާގެ ގޮތުގައި 492.6 މިލިއަން ރުފިޔާ ލިބިފައިވެއެވެ.
ބޭންކުގެ އާމްދަނީއަށް ބަލާއިރު، ފައިނޭންސިން ހަރަކާތްތަކުން ލިބުނު އާމްދަނީ ވަނީ 599.3 މިލިއަން ރުފިޔާއިން 785.9 މިލިއަން ރުފިޔާއަށް އިތުރުވެފައެވެ. މީގެ އިތުރުން ފީ އާއި ކޮމިޝަނުގެ ގޮތުގައި ލިބުނު އާމްދަނީ ވެސް ވަނީ 145.5 މިލިއަން ރުފިޔާއިން 214.2 މިލިއަން ރުފިޔާއަށް އިތުރުވެފައެވެ. މިއާއެކު ބޭންކުގެ ޖުމްލަ އޮޕަރޭޓިން އާމްދަނީ ވަނީ 897.4 މިލިއަން ރުފިޔާއަށް އަރާފައެވެ. މިއީ އޭގެ ކުރީ އަހަރު ލިބުނު 709.2 މިލިއަން ރުފިޔާއާ އަޅާބަލާއިރު ފާހަގަކޮށްލެވޭ ބޮޑު ކުރިއެރުމެކެވެ.
މާލީ ބަޔާންތަކުން ދައްކާގޮތުގައި 2025 ވަނަ އަހަރު ނިމުނުއިރު ބޭންކުގެ ޖުމްލަ މުދަލުގެ އަގު (ޓޯޓަލް އެސެޓްސް) ވަނީ 16.6 ބިލިއަން ރުފިޔާއަށް އަރާފައެވެ. މިއީ 2024 ވަނަ އަހަރުގެ ނިޔަލަށް ހުރި 11.4 ބިލިއަން ރުފިޔާއާ އަޅާބަލާއިރު ބޮޑު އިތުރުވުމެކެވެ.
ބޭންކުގައި ކަސްޓަމަރުން ފައިސާ ރައްކާކޮށްފައިވާ މިންވަރު ނުވަތަ ކަސްޓަމާ ޑިޕޮސިޓްސް ވެސް ވަނީ ވަރަށް ބޮޑަށް އިތުރުވެފައެވެ. އެގޮތުން 2024 ވަނަ އަހަރު 9.1 ބިލިއަން ރުފިޔާގައި ހުރި ކަސްޓަމަރުންގެ އެކައުންޓްތަކުގެ ބެލެންސް، 2025 ވަނަ އަހަރު ނިމުނުއިރު ވަނީ 13.6 ބިލިއަން ރުފިޔާއަށް އިތުރުވެފައެވެ. މިއާއެކު ބޭންކުގެ ޖުމްލަ ލަޔަބިލިޓީޒް ވަނީ 15.1 ބިލިއަން ރުފިޔާއަށް އަރާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
