2028 ގެ ރިޔާސީ އިންތިހާބުގައި ވާދަކުރެއްވުމަށް ރައީސް މުޢިއްޒަށް ދައުވަތު އެރުވުމުގެ ގަރާރު ޕީއެންސީން ފާސްކޮށްފި

2028 ވަނަ އަހަރު ބާއްވާ ރިޔާސީ އިންތިހާބުގައި ދެވަނަ ދައުރަކަށް ވާދަކުރެއްވުމަށް، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ދައުވަތު އެރުވުމަށް ހުށަހެޅި ހާއްސަ ގަރާރު އެ ޕާޓީގެ މަތީ މަޖިލީހުން މިއަދު ފާސްކޮށްފިއެވެ.

ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން ޢަބްދުއްރަޙީމް ޢަބްދުﷲ ރިޔާސަތު ބެލެހެއްޓެވި މި ބައްދަލުވުމުގައި، މި ގަރާރު ފާސްކޮށްފައިވަނީ ބައްދަލުވުމުގައި ބައިވެރިވެވަޑައިގެންނެވި މަތީ މަޖިލީހުގެ 1119 މެންބަރުންގެ އިއްތިފާގުންނެވެ.

މި ގަރާރު ފާސްކުރުމާއެކު، ޕީއެންސީގެ އަސާސީ ގަވާއިދުގެ 88 ވަނަ މާއްދާގައިވާ ގޮތުގެ މަތިން، ޕްރައިމަރީއަކާ ނުލައި 2028 ވަނަ އަހަރުގެ ރިޔާސީ އިންތިހާބުގައި އެ ޕާޓީގެ ޓިކެޓުގައި ވާދަކުރެއްވުމުގެ ރަސްމީ ދައުވަތު ރައީސް ޑރ. މުޢިއްޒަށް އެރުވުމުގެ ކަންކަން ކުރިއަށްދާނެއެވެ.

މަތީ މަޖިލީހުން މި ގަރާރު ފާސްކުރީ، ވެރިކަމާ ހަވާލުވެވަޑައިގަތުމަށްފަހު ރައީސް މުޢިއްޒު ގައުމުގެ މިނިވަންކަމާއި ސިޔާދަތު ރައްކާތެރިކުރެއްވުމަށާއި، އިގްތިސާދު ހަމަމަގަށް އެޅުއްވުމަށާއި، ބޯހިޔާވަހިކަމާއި އިޖުތިމާއީ ދުޅަހެޔޮކަން ގާއިމުކުރެއްވުމަށް ކުރައްވަމުން ގެންދަވާ އަގުހުރި މަސައްކަތްޕުޅުތައް ފާހަގަކޮށް، ގައުމަށް މިހާރު ގެންނަވަމުންދާ ތަރައްގީގެ ދަތުރު ދެމެހެއްޓުމަށްޓަކައި އެމަނިކުފާނަށް ދެވަނަ ދައުރެއް ދިނުމަކީ ކޮންމެހެން މުހިންމު ކަމެއް ކަމަށް އިއްތިފާގުވަމުންނެވެ.

މިއީ 2028 ވަނަ އަހަރުގެ ރިޔާސީ ރޭހަށް ޕީއެންސީގެ ފަރާތުން ރައީސް ޑރ. މުޙައްމަދު މުޢިއްޒަށް ރަސްމީ ހައިސިއްޔަތުން ރުހުން ދިން ފުރަތަމަ ފަހަރެވެ.