ރާއްޖޭގައި އަލަށް "ނެނޯ ސާޖަރީ" ތައާރަފްކޮށްފި

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއި ދަރުމަވަންތަ ހޮސްޕިޓަލް ގުޅިގެން، ރާއްޖޭގައި އަލަށް "ނެނޯ އާތްރޯސްކޯޕީ" ނުވަތަ ނެނޯ ސާޖަރީގެ ހިދުމަތް ރަސްމީކޮށް ފަށައިފިއެވެ.

މިއީ ހުޅުތަކުގެ މައްސަލަތައް ދެނެގަނެ، ފަރުވާ ދިނުމަށް ބޭނުންކުރާ އެންމެ ޒަމާނީ އަދި ކުޑަ އޮޕަރޭޝަނެކެވެ.

އާދީއްތަ ދުވަހު މި ހިދުމަތް ތައާރަފްކުރިއިރު، މިއީ ރާއްޖޭގެ ސިއްހީ ދާއިރާގައި މިފަދަ ސާޖަރީއެއް ކުރަން ފެށި ފުރަތަމަ ފަހަރު ކަމަށް އައިޖީއެމްއެޗުން މައުލޫމާތު ދެއެވެ. މި އޮޕަރޭޝަނުގައި ބޭނުންކުރަނީ އިންޖެކްޝަން ޖަހާ ކަށީގެ ސައިޒުގެ ވަރަށް ކުޑަ، ހައި-ޑެފިނިޝަން ކެމެރާއެކެވެ.

މިކަމާ ގުޅޭގޮތުން އޯތޮޕެޑިކްސް ޑޮކްޓަރު އިސްމާއިލް ޒާހިރު ވިދާޅުވީ، މި ނެނޯ ކެމެރާއަކީ ވަރަށް ބޮޑަށް ލެންބޭ ގޮތަށް ފަރުމާކޮށްފައިވާ އެއްޗަކަށް ވުމުން، ހަށިގަނޑުގެ ވަރަށް ހަނި ތަންތަނަށް ކެމެރާ ލައްވައިގެން ހުޅުތަކުގެ އެތެރެ ބަލައިލެވޭނެ ކަމަށެވެ. މީގެ ސަބަބުން ހުޅުތަކުގެ ކަށިތަކާއި ލިގަމެންޓްތަކަށް ލިބިފައިވާ ގެއްލުންތައް ދެނެގަތުމަށް ބައެއް ހާލަތްތަކުގައި އެމްއާރްއައި ހެދުމުގެ ބަދަލުގައި މި ޓެކްނޮލޮޖީ ބޭނުންކުރެވޭނެ ކަމަށް އޭނާ ފާހަގަކުރެއްވިއެވެ.

އެނެސްތީސިއޮލޮޖީ ޑިޕާޓްމަންޓުގެ ޑޮކްޓަރު އަސަދު މުހައްމަދު ޝަހީދު ވިދާޅުވި ގޮތުގައި، މި ސާޖަރީގެ ސަބަބުން ބަލިމީހާ މުޅިން ހޭނައްތަން ނުޖެހި ފަރުވާ ދެވޭނެއެވެ. އަދި ބޮޑެތި އޮޕަރޭޝަންތަކާ ހިލާފަށް ހަންގަނޑުން ބޮޑު ތަންތަން ކޮށަން ނުޖެހޭތީ، ބަލިމީހާ މާ އަވަހަށް ރަނގަޅުވެ، ހޮސްޕިޓަލުގައި މަޑުކުރަން ނުޖެހި އެދުވަހުން އެދުވަހަށް ގެއަށް ދެވޭނެ (އައުޓް ޕޭޝަންޓް) މަގު ފަހިވެގެންދާނެއެވެ. މިއީ ވަރަށް ބޮޑަށް ބަލިވެފައިވާ މީހުންނަށްވެސް ފަރުވާ ދިނުމުގައި ލިބޭ ބޮޑު ލުޔެއްކަން އޭނާ ފާހަގަކުރެއްވިއެވެ.

މި ފަހަކަށް އައިސް އައިޖީއެމްއެޗުން ދަނީ ސިއްހީ ހިދުމަތްތައް ތަރައްގީކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިދިޔަ އަހަރުގެ އޮކްޓޫބަރު މަހު ވަނީ ހަތަރު ގުނަ ސާފުކޮށް މަންޒަރު ފެންނަ 4K އާތްރޯސްކޯޕީ ކެމެރާތައްވެސް ބޭނުންކުރަން ފަށާފައެވެ. މިފަދަ ޒަމާނީ ވަސީލަތްތަކުގެ ސަބަބުން މެޑިކަލް ދަރިވަރުންނަށް އޮޕަރޭޝަންތައް ބަލައި ދަސްކުރުމަށްވެސް ބޮޑެތި ފަސޭހަތަކެއް ލިބިގެންދާނެއެވެ.