ހައްޖާޖީންގެ ސަމާލުކަމަށް: ބަލީގެ އަލާމާތެއް ފެނިއްޖެނަމަ ލަސްނުކޮށް ރިޕޯޓުކުރުމަށް އައިޖީއެމްއެޗުން އިލްތިމާސްކޮށްފި

މިއަހަރުގެ ބަރަކާތްތެރި ޙައްޖުގެ އަޅުކަން އަދާކުރެއްވުމަށްފަހު އެނބުރި ރާއްޖެ ވަޑައިގަންނަވާ ފަރާތްތަކުގެ ސިއްޙީ ރައްކާތެރިކަމަށްޓަކައި، ޚާއްސަ ސަމާލުކަމެއް ދިނުމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން އިލްތިމާސްކޮށްފިއެވެ.

އައިޖީއެމްއެޗުން ބުނީ ހައްޖުގެ މުގައްދަސް އަޅުކަމަށްފަހު އެނބުރި ވަޑައިގަންނަވާ ބޭފުޅުންގެ ތެރެއިން ހުން އައުން ނުވަތަ ރީގާ (ނޭވާލާ ނިޒާމުގެ ބަލިތައް) ފަދަ އެއްވެސް އަލާމާތެއް ފެންނަ ނަމަ، އަދި ސިއްޙީ އެހީތެރިކަން ބޭނުންފުޅުވާނަމަ، ލަސްނުކޮށް ހޮސްޕިޓަލުގެ އިމަޖެންސީ ރޫމް (އީ.އާރު) އަށް ވަޑައިގަތުމަށް ވަނީ އިލްތިމާސްކޮށްފައެވެ.

އައިޖީއެމްއެޗުން ބުނީ އީ.އާރަށް ވަޑައިގެން ޓްރަޔަޖް ޓޯކަން ނަންބަރަކަށް މަޑުނުކޮށް، ޓްރަޔަޖް ކައުންޓަރުގައި ހުންނަވާ މުވައްޒަފަށް ބަލީގެ މައުލޫމާތު ރިޕޯޓުކުރުމަށް އެދޭ ކަމަށެވެ. އެއަށްފަހު އެތަނުގެ މުވައްޒަފުން ދޭ އިރުޝާދާ އެއްގޮތަށް ކުރިއަށް ދިއުމަށްވެސް ވަނީ އެދިފައެވެ. މީގެ އިތުރުން ޑޮކްޓަރަށް ދައްކަން ވަޑައިގަންނަވާއިރު ކޮންމެހެންވެސް މާސްކް އަޅުއްވައިގެން ވަޑައިގަތުމަށް ވަނީ އިލްތިމާސްކޮށްފައެވެ.

ހައްޖުގެ އަޅުކަމަށްފަހު އެނބުރި ވަޑައިގަންނަވާ ބޭފުޅުންގެ ތެރެއިން އުމުރުން ދުވަސްވީ މީހުންނާއި، ދާއިމީ ބަލިތަކަށް ފަރުވާ ހޯދާ މީހުންނާއި، ކުޑަކުދިންގެ އިތުރުން މާބަނޑު މީހުންނާއި ދިފާއީ ނިޒާމު ބަލިކަށި މީހުންނަށް ހާއްސަ ސަމާލުކަމެއް ދިނުމަށް އައިޖީއެމްއެޗުން ވަނީ އިރުޝާދު ދީފައެވެ.

ބަލިތަކުން ރައްކާތެރިވުމަށްޓަކައި އަމިއްލަ ސާފުތާހިރުކަމަށް އިސްކަންދީ، ގަވާއިދުން ސައިބޯނިލައިގެން އަތްދޮވުން ނުވަތަ ހޭންޑް ސެނިޓައިޒާ ބޭނުންކުރުން ފަދަ ކަންކަމަށް ސަމާލުވުމަށްވެސް ވަނީ އެދިފައެވެ. އަދި ބަލިމީހުންނަށް ޒިޔާރަތްކުރުމުގެ ބަދަލުގައި، ކޮންމެހެން ބޭނުންވެއްޖެ ހާލަތެއްގައި މެނުވީ ހޮސްޕިޓަލަށް ޒިޔާރަތް ނުކުރުމަށްވެސް އައިޖީއެމްއެޗުން ވަނީ އިލްތިމާސްކޮށްފައެވެ.