ތެލުގެ އަގު އުފުލުމާއެކު ދައުލަތުން ދޭ އެހީއާއި ސަބްސިޑީއަށް ކުރި ހޭދަ 44 އިންސައްތަ އިތުރުވެއްޖެ

ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން، ދައުލަތުން ދޫކުރާ އެހީއާއި ސަބްސިޑީތަކަށް ކުރި ހޭދަ މިދިޔަ އަހަރުގެ އެ މުއްދަތާ އަޅާބަލާއިރު 44 އިންސައްތަ އިތުރުވެފައިވާ ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިސަސް އިން ހާމަކޮށްފިއެވެ.

ފައިނޭންސް މިނިސްޓްރީން އާންމުކޮށްފައިވާ ވީކްލީ ފިސްކަލް ރިޕޯޓުގައިވާ ގޮތުން، މި އޮގަސްޓް މަހުގެ 13 ވަނަ ދުވަހުގެ ނިޔަލަށް އެހީއާއި ސަބްސިޑީގެ ގޮތުގައި 524 މިލިއަން އެމެރިކާ ޑޮލަރު ވަނީ ހޭދަކޮށްފައެވެ. މިއީ މިދިޔަ އަހަރުގެ މި މުއްދަތުގައި ހޭދަކުރި 363 މިލިއަން ޑޮލަރާ އަޅާބަލާއިރު ބޮޑު އިތުރުވުމެކެވެ.

މި ހޭދަ މިހާ ބޮޑަށް އިތުރުވާން މެދުވެރިވި މައިގަނޑު ސަބަބަކީ މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު އުފުލި، ކަރަންޓު އުފެއްދުމަށް ބޭނުންވާ ތެލަށް ދޭ ސަބްސިޑީގެ ޚަރަދު ބޮޑުވުމެވެ. އެގޮތުން ހަމައެކަނި ސަބްސިޑީއަށް ކުރި ޚަރަދު ވަނީ މިދިޔަ އަހަރުގެ 123 މިލިއަން ޑޮލަރުން 78.4 އިންސައްތަ އިތުރުވެ، 220 މިލިއަން ޑޮލަރަށް އަރާފައެވެ.

މީގެ އިތުރުން، ދެވަނައަށް އެންމެ ބޮޑު ހޭދައެއް ކޮށްފައިވަނީ ކައުންސިލްތަކަށް ދޭ ބްލޮކް ގްރާންޓަށެވެ. އެގޮތުން މިދިޔަ އަހަރުގެ އެ މުއްދަތުގައި ބްލޮކް ގްރާންޓަށް 77.8 މިލިއަން ޑޮލަރު ދޫކުރިއިރު، މި އަހަރު ވަނީ 17 އިންސައްތައިގެ އިތުރުވުމަކާއެކު 90.8 މިލިއަން ޑޮލަރު ދޫކޮށްފައެވެ.

އާސަންދަ ސްކީމަށް ކުރި ހޭދަވެސް ވަނީ 14 އިންސައްތަ އިތުރުވެފައެވެ. އެގޮތުން މި އަހަރުގެ މިހާތަނަށް އާސަންދައަށް 84.3 މިލިއަން ޑޮލަރު ހޭދަކޮށްފައިވާއިރު، މިދިޔަ އަހަރު މި އަދަދު އުޅުނީ 71.3 މިލިއަން ޑޮލަރުގައެވެ. ނަމަވެސް، މެޑިކަލް ވެލްފެއާގެ ގޮތުގައި ކުރި ހޭދަ ވަނީ މިދިޔަ އަހަރުގެ 12.58 މިލިއަން ޑޮލަރާ އަޅާބަލާއިރު 23 އިންސައްތަ ދަށްވެ، 9.66 މިލިއަން ޑޮލަރަށް ތިރިވެފައެވެ.

ފައިނޭންސް މިނިސްޓްރީން ފާހަގަކުރި ގޮތުގައި، ދުނިޔޭގެ ބާޒާރުގައި ތެލުގެ އަގު އުފުލެމުން ދިޔަނަމަވެސް، މިފަދަ ސަބްސިޑީތައް ދިނުމުގެ މައިގަނޑު ބޭނުމަކީ ބައިނަލްއަޤްވާމީ ބާޒާރަށް އަންނަ ލޮޅުންތަކުން ރައްޔިތުން ރައްކާތެރިކޮށް، އަސާސީ މުދަލާއި ޚިދުމަތްތައް އަތްފޯރާ އަގެއްގައި ރައްޔިތުންނަށް ފޯރުކޮށްދިނުމެވެ.