ސަރުކާރު ވެއްޓޭނެ ކަމަށް ނަޝީދު ވިދާޅުވުމުން މުޙައްމަދު އިސްމާޢީލްގެ ވަރުގަދަ ރައްދެއް: "ދަތްއަޅާނެ ކުއްތާއެއް ވައްވަކެއް ނުޖަހާނެ"
ސަރުކާރު ވައްޓާލަން މަގުމައްޗަށް ނުކުންނަން ނުޖެހޭނެ ކަމަށާއި، ސަރުކާރު އަމިއްލައަށް ރޫޅޭނެ ކަމަށް ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކަށް، ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުޙައްމަދު އިސްމާޢީލް ވަރުގަދަ ރައްދެއް ދެއްވައިފިއެވެ.
މުޙައްމަދު އިސްމާޢީލް މި ރައްދު ދެއްވާފައިވަނީ "އެކްސް" ގައި ކުރެއްވި ޕޯސްޓެއްގައެވެ. އޭނާގެ ޕޯސްޓުގައި ނަޝީދަށް އަމާޒުކުރައްވައި ވިދާޅުވެފައިވަނީ، ސަރުކާރު ވައްޓާލާނެ ކަމަށާއި ސަރުކާރު ބަދަލުކުރާނެ ކަމަށް ވިދާޅުވެ މުޅި ރާއްޖޭގައި އަމިއްލަފުޅު މޮޅުކަން ދައްކަވަން އުޅުއްވިޔަސް، އެ ދައްކަވާ ވާހަކަފުޅުތަކަކީ އެއްވެސް ވަރަކަށް ދެކޮޅުޖެހޭ ވާހަކަތަކެއް ނޫން ކަމަށެވެ.
"ދަންނަވަންތޯ! ފުރަތަމަ އަމިއްލަ ގޭތެރެ ހައްލު ކުރެވޭތޯ ބަލާ،" ނަޝީދުގެ ސިޔާސީ ޙަރަކާތްތަކަށް ފާޑުވިދާޅުވަމުން މުޙައްމަދު އިސްމާޢީލް ލިޔުއްވާފައިވެއެވެ.
މީގެ އިތުރުން، ނަޝީދު ދައްކަވަމުންދާ ވާހަކަފުޅުތަކަށް އިޝާރާތް ކުރައްވައި މުޙައްމަދު އިސްމާޢީލް ވަނީ ވަރަށް ބޮޑަށް ފާޑުވިދާޅުވެ، މުސްކުޅި މިސާލު ބަހެއް ބޭނުންކުރައްވާފައެވެ. އެގޮތުން "ދަތްއަޅާނެ ކުއްތާއެއް ވައްވަކެއް ނުޖަހާނެ" ކަމަށް ވިދާޅުވެ، ނަޝީދުގެ އިންޒާރުތަކުގައި އެއްވެސް ބުރަދަނެއް ނެތްކަން އޭނާ ވަނީ ފާހަގަކުރައްވާފައެވެ.
ރައީސް ޑރ. މުޙައްމަދު މުޢިއްޒުގެ ސަރުކާރާ ދެކޮޅަށް އިދިކޮޅު ފަރާތްތަކުން ތަފާތު އެކި ވާހަކަތައް ދައްކަމުންދާ ދަނޑިވަޅެއްގައި، ވެރިކަން ކުރާ ޕީއެންސީއަށް ނިސްބަތްވާ މުޙައްމަދު އިސްމާޢީލް ދެއްވި މި ރައްދަކީ ސިޔާސީ މަޝްރަހުގައި ބޮޑު ސަމާލުކަމެއް ލިބިގެންދިޔަ ރައްދެކެވެ. ސަރުކާރު ދިފާޢުކުރައްވައި އޭނާ ވިދާޅުވީ، ބޭރުގައި ހުންނަވައިގެން ސަރުކާރު ރޫޅާލުމުގެ ވާހަކަ ދެއްކެވުމުގެ ބަދަލުގައި، އަމިއްލަ ސިޔާސީ ކަންކަން އިޞްލާޙުކުރުން މާ މުހިންމު ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
