ޓެކްސީތަކަށް ޕާކްކުރުމަށް ޙާއްސަ ޒޯނެއް ކަނޑައަޅަނީ

ކުރިއަށް އޮތް 2 ހަފްތާގެ ތެރޭގައި ޓެކްސީތަކަށް ޕާކްކުރުމަށް ޙާއްސަ ޒޯނެއް ކަނޑައެޅިގެންދާނެ ކަމަށް މިނިސްޓަރ މުޙައްމަދު އަމީން ވިދާޅުވެއްޖެއެވެ. މިނިސްޓަރ އަމީން މިހެން ވިދާޅުވީ ޕާކިންގ ޒޯންތައް ކަނޑައެޅުމުގެ މަސައްކަތް ކުރިއަށްދާ ވަގުތެއްގައެވެ.

މިނިސްޓަރ އަމީން ވިދާޅުވި ގޮތުގައި، މި މަޝްރޫޢު ފުރަތަމަ ފެށިގެންދާނީ ހުޅުމާލޭގައެވެ. އަދި މާލޭގައި މި ކަން ކުރެވޭނެ ގޮތެއް ބަލަމުންދާ ކަމަށްވެސް މިނިސްޓަރ ވިދާޅުވިއެވެ. މި ޒޯންގައި ޕާކުކުރުމުގެ ހުއްދަ ލިބޭނީ ހަމައެކަނި ޓެކްސީ ބޯޑު ހަރުކޮށްފައިވާ ވެހިކަލްތަކަށް ކަމަށް މިނިސްޓަރ ފާހަގަކުރެއްވިއެވެ.

އިތުރަށް މިނިސްޓަރ ވިދާޅުވީ، މި ޒޯން ކަނޑައެޅުމާއެކު އެތަނަށް ޚާއްޞަ ގަވާއިދެއް ހެދުމަކީ މުހިންމު ކަމެއް ކަމަށެވެ. އަދި މި ޒޯނަކީ ޓެކްސީ ޑްރައިވަރުން މަސައްކަތުގެ އުޅުމަށްފަހު ބްރޭކް ނަގާ ގަޑީގައި ޕާކްކުރުމަށް ހަދާ ޒޯނެއް ކަމަށާއި، ތާއަބަދު ވެހިކަލް ޕާކުކޮށްފައި ބޭއްވުމަށް ހަދާ ޕާކިންގ ޒޯނެއް ނޫން ކަމަށްވެސް މިނިސްޓަރ ވިދާޅުވިއެވެ.

މިނިސްޓަރ އަމީން އިތުރަށް ވިދާޅުވި ގޮތުގައި، މި ޒޯން ބޭނުންކުރުމުގެ ފުރުޞަތު ހުރިހާ ޓެކްސީ ޑްރައިވަރުންނަށްވެސް ހަމަހަމަ ގޮތެއްގައި ލިބިގެންދާނެއެވެ. މިއީ ޓެކްސީ ޑްރައިވަރުންނަށް ދިމާވެފައިވާ ޕާކިންގގެ ދަތިކަން ޙައްލުކުރުމަށް އެޅޭ މުހިންމު ފިޔަވަޅުތަކުގެ ތެރެއިން ފިޔަވަޅެކެވެ.