ރާއްޖޭގައި ބައިނަލްއަޤްވާމީ ޤުރްއާން މުބާރާތެއް ބޭއްވުމާ ގުޅޭގޮތުން ސަޢޫދީ ޢަރަބިއްޔާއާއެކު މަޝްވަރާކޮށްފި

ދިވެހިރާއްޖޭގައި ބައިނަލްއަޤްވާމީ ފެންވަރުގެ ޤުރްއާން މުބާރާތެއް ބޭއްވުމާ ގުޅޭގޮތުން ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު މުހިންމު މަޝްވަރާތަކެއް ކޮށްފިއެވެ.

މި މަޝްވަރާތައް ކުރިއަށްދިޔައީ ދިވެހިރާއްޖޭގެ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު މިހާރު ސަޢޫދީ ޢަރަބިއްޔާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، އެ ޤައުމުގެ އިސްލާމީ ކަންތައްތަކާ ބެހޭ ވަޒީރު ޑރ. ޢަބްދުއްލަޠީފް ބިން ޢަބްދުލްޢަޒީޒް އާލް-ޝައިޚްއާ ބައްދަލުކުރައްވައި ދެއްކެވި ވާހަކަފުޅުގައެވެ. ވަޒީރު ޑރ. ޝަހީމް ސަޢޫދީ ޢަރަބިއްޔާއަށް މި ދަތުރުފުޅު ކުރައްވަނީ އެ ޤައުމުގެ އިސްލާމީ ކަންތައްތަކާ ބެހޭ ވަޒީރުގެ ޚާއްޞަ ދަޢުވަތަކަށެވެ.

މި ބައްދަލުވުމުގައި ރާއްޖޭގެ އިސްލާމީ ދާއިރާ ކުރިއެރުވުމަށް ގިނަ ކަންތައްތަކަކާ ގުޅޭގޮތުން ވަނީ މަޝްވަރާކުރައްވާފައެވެ. އެގޮތުން، ރާއްޖޭގައި ބައިނަލްއަޤްވާމީ ފެންވަރުގެ ޤުރްއާން މުބާރާތެއް ބޭއްވުމަށް ސަޢޫދީގެ އެހީތެރިކަމަށް އެދިވަޑައިގެންފައިވާނެ ކަމަށާއި، އަދި މި މުބާރާތަކީ ކޮންމެ އަހަރަކުވެސް ބާއްވާ މުބާރާތަކަށް ހެދުމަށް މަޝްވަރާކުރެވުނު ކަމަށް ވަޒީރު ޑރ. ޝަހީމް ވިދާޅުވިއެވެ.

މީގެއިތުރުން، ސަޢޫދީ ޢަރަބިއްޔާއިން ރާއްޖެއާމެދު ބަހައްޓަވާ ގާތް ގުޅުމަށް ޝުކުރު އަދާކުރައްވައި، ދެ ޙަރަމްފުޅުގެ ޚާދިމް، ސަޢޫދީގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢޫދާއި، ވަލީޢަހުދު އަދި ބޮޑުވަޒީރު މުޙައްމަދު ބިން ސަލްމާން ބިން ޢަބްދުލްޢަޒީޒް އާލް ސަޢޫދު ރާއްޖެއަށް ދެއްވާ އެއްބާރުލުމާއި އެހީތެރިކަން ވަޒީރު ފާހަގަކުރެއްވިއެވެ. ހަމައެއާއެކު، ދެ ޤައުމުގެ ދެމެދުގައި އޮތް އަޚުވަންތަ ގުޅުން އިތުރަށް ބަދަހިކުރެއްވުމަށް އެ ބޭފުޅުން ކުރައްވާ މަސައްކަތްޕުޅުތަކަށް ވަޒީރު ތަޢުރީފުކުރެއްވިއެވެ.

ވަޒީރު ޑރ. ޝަހީމް ވަނީ އެމަނިކުފާނަށް ސަޢޫދީން ދެންނެވި ހޫނު މަރުޙަބާއަށާއި ދަޢުވަތަށްޓަކައި އެ ޤައުމުގެ އިސްލާމީ ކަންތައްތަކާ ބެހޭ ވަޒީރަށް ޝުކުރު އަދާކުރައްވާފައެވެ. އަދި ދެ ޤައުމުގެ އިސްލާމީ ވުޒާރާގެ ދެމެދުގައިވާ ގުޅުން ހަރުދަނާކުރުމަށާއި އިސްލާމްދީނުގެ ޚިދުމަތުގައި ސަޢޫދީން ދެއްވާ އެއްބާރުލުން ވެސް ފާހަގަކުރެއްވިއެވެ.

މި ދަތުރުފުޅާ ގުޅޭގޮތުން މީސްމީޑިއާގައި ޙިއްޞާކުރެއްވި މެސެޖެއްގައި ވަޒީރު ޑރ. ޝަހީމް ވިދާޅުވީ، ދެ ޤައުމަށްވެސް ފާގަތި ދުވަސްތަކަކަށް އެދިވަޑައިގަންނަވާ ކަމަށެވެ. އަދި ސަޢޫދީގެ ރަސްގެފާނާއި ވަލީޢަހުދުގެ އިރުޝާދުގެ ދަށުންނާއި، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.

ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު ސިޔާސީ ގުޅުން ޤާއިމުކުރެވުނީ 17 މާރިޗު 1981 ގައެވެ. އޭގެފަހުން ދެ ޤައުމުގެ ދެމެދުގައި އަބަދުވެސް އޮންނަނީ ވަރަށް ގާތް، އެކުވެރި ގުޅުމެކެވެ. ރާއްޖޭގެ ދީނީ ކަންކަން ކުރިއެރުވުމުގެ އިތުރުން، ދިވެހިން ޙައްޖުގެ އަޅުކަން އަދާކުރުމުގައި ލުއިފަސޭހަ އިންތިޒާމުތައް ހަމަޖައްސައިދިނުމުގައާއި، ރާއްޖޭގެ ތަރައްޤީއަށް ބޭނުންވާ މާލީ އަދި އެހެނިހެން އެހީތެރިކަން ފޯރުކޮށްދިނުމުގައި ސަޢޫދީ ޢަރަބިއްޔާއަކީ އަބަދުވެސް ފާހަގަކޮށްލެވޭ މުހިންމު ބައިވެރިއެކެވެ.