ޤައުމީ 4 ބޮޑު މައްސަލަ ޙައްލުކުރުމަށް ސަރުކާރުން ނިޒާމީ ބަދަލުތަކެއް ގެނެސްފި: ވަޒީރު އިޙްސާން
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ މައިގަނޑު އަމާޒަކީ ދިވެހި މުޖުތަމަޢަށް ދިމާވެފައިވާ އެންމެ ބޮޑު ހަތަރު މައްސަލަ ޙައްލުކުރުން ކަމަށާއި، އެކަމަށްޓަކައި ޚާއްޞަ ނިޒާމީ ބަދަލުތަކެއް ގެންނަވާފައިވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ވަޒީރު އިޙްސާން ވިދާޅުވީ، ރައީސުލްޖުމްހޫރިއްޔާ އެންމެ އިސްކަމެއް ދެއްވައިގެން ޙައްލުކުރެއްވުމަށް އަމާޒު ހިއްޕަވާފައިވާ ހަތަރު މައްސަލައަކީ މަސްތުވާތަކެތީގެ މައްސަލައާއި، ގޭންގު ކުށްތަކާއި، ޤަވާޢިދާ ޚިލާފަށް އުޅޭ ބިދޭސީންގެ މައްސަލައިގެ އިތުރުން ޒުވާނުން ކުށުގެ މާހައުލުން ސަލާމަތްކުރުން ކަމަށެވެ.
މި މައްސަލަތަކަށް ދާއިމީ އަދި ހަރުދަނާ ޙައްލެއް ހޯއްދަވައި، ނަތީޖާ ނެރުމަށްޓަކައި ސަރުކާރުން އެންމެ ފުރަތަމަވެސް އެޅުއްވި ފިޔަވަޅަކީ އިދާރީ އޮނިގަނޑަށް ބަދަލު ގެނައުން ކަމަށް ވަޒީރު ފާހަގަކުރެއްވިއެވެ. އެގޮތުން، މީގެ ކުރިން އެކި ވުޒާރާތަކަށް ބެހިފައި ހުރި ކަމާގުޅުންހުރި މުހިންމު އިދާރާތައް އެއް ވުޒާރާއެއްގެ ދަށަށް ގެނެސް، އެކަށީގެންވާ ގޮތެއްގައި މަސައްކަތް ކުރެވޭނެ ފަދަ ނިޒާމެއް ރައީސުލްޖުމްހޫރިއްޔާ ބައްޓަންކުރައްވާފައިވާ ކަމަށް ވަޒީރު ވިދާޅުވިއެވެ.
"ރައީސުލްޖުމްހޫރިއްޔާގެ އަމާޒަކީ ޑްރަގާއި، ގޭންގު ކުށްތަކާއި، ބިދޭސީންގެ މައްސަލައިގެ އިތުރުން ޒުވާނުން ކުށުގެ މާހައުލުން ސަލާމަތްކުރުމުގެ 4 ބޮޑު މައްސަލަ ހައްލުކުރުން. މިކަމަށް ނަތީޖާ ނެރުމަށްޓަކައި އެންމެ ފުރަތަމަވެސް ކުރެއްވި ކަމަކީ އެކި ވުޒާރާތަކަށް ބެހިފައިވި އިދާރާތައް އެއް ވުޒާރާއެއްގެ ދަށަށް ގެނެސަ މި މަސައްކަތް ކުރެވޭނެ ގޮތަށް ނިޒާމް ބައްޓަންކުރެއްވުން،" ވަޒީރު އިޙްސާން ވިދާޅުވިއެވެ.
މި ގެނެވުނު ބަދަލުތަކާއެކު، ސަލާމަތީ އަދި ތަންފީޒީ އިދާރާތަކުގެ މެދުގައި އޮންނަންޖެހޭ ގުޅުން އިތުރަށް ބަދަހިވެ، ޤައުމީ ފެންވަރުގައި ކުރިމަތިވެފައިވާ މިފަދަ ބޮޑެތި އިޖުތިމާޢީ އަދި ޤާނޫނީ މައްސަލަތަކަށް އަވަސް އަދި ދެމެހެއްޓެނިވި ޙައްލެއް ލިބިގެންދާނެ ކަމަށް ދާޚިލީ ވުޒާރާއިން ޤަބޫލުކުރެއެވެ. ސަރުކާރުން ދަނީ މި ދާއިރާތަކުން ހަރުދަނާ ފިޔަވަޅުތަކެއް އަޅަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
