ކަނޑުދަތުރުފަތުރާއި މަސްދަތުރުތަކަށް ޚާއްޞަ ރާއްޖޭގެ ފުރަތަމަ މެރިން ސުޕަރ އެޕް "އޮޑިގޯ" ތަޢާރަފުކޮށްފި

ރާއްޖޭގެ ކަނޑުދަތުރުފަތުރާއި، މަސްވެރިކަމުގެ ތަފާތު ތަޖުރިބާތަކާއި އެކްސްކާޝަންތައް އެއް ފުރާޅެއްގެ ދަށުން ފަސޭހަކަމާއެކު ބުކްކޮށްލެވޭ ރާއްޖޭގެ ފުރަތަމަ މެރިން ސުޕަރ އެޕް، "އޮޑިގޯ" ރަސްމީކޮށް ތަޢާރަފުކޮށްފިއެވެ.

އޮޑިގޯ ޕްރައިވެޓް ލިމިޓެޑުން އުފެއްދި މި އެޕްލިކޭޝަނަކީ ދިވެހިންނާއި ރާއްޖެއަށް ޒިޔާރަތްކުރާ ފަތުރުވެރިންނަށް ކަނޑުމަތީގެ ތަފާތު ހަރަކާތްތައް ފަސޭހަކަމާއެކު ހޯދައި، ބުކިންގ ހެދުމުގެ ފުރުޞަތު ފަހިކޮށްދިނުމުގެ މަޤްޞަދުގައި ތައްޔާރުކޮށްފައިވާ ޑިޖިޓަލް ޕްލެޓްފޯމެކެވެ. މީގެ ތެރޭގައި މަސްދަތުރުތައް (ފިޝިން ޓްރިޕްސް)، ޕްރައިވެޓް ބޯޓު ޗާޓަރުތައް، ޝެޑިއުލް ފެރީ ދަތުރުތައް އަދި ތަފާތު އެކްސްކާޝަންތައް ހިމެނެއެވެ.

މި އެޕް މެދުވެރިކޮށް އަތޮޅުތަކާއި ރަށްތައް ވަކިން ސާޗްކޮށް، ބޭނުންވާ ވައްތަރެއްގެ އުޅަނދެއް ޚިޔާރުކުރެވޭނެއެވެ. މީގެއިތުރުން، އުޅަނދުތަކުގެ ފޮޓޯއާއި، ތަފުސީލުތައް، އަގުތައް އަދި އެހެން ފަރާތްތަކުގެ ރިވިއުތައް ބަލައިލެވޭނެއެވެ. ޚާއްޞަކޮށް މަސްވެރިކަމަށް ލޯބިކުރާ ފަރާތްތަކަށް ކަނޑުއަޑީގެ ފުން މަސްވެރިކަމާއި، ޓްރޯލިންގ ފަދަ ސްޕޯޓްސް ފިޝިންގ ދަތުރުތައް އެކި އަތޮޅުތަކުން ބުކްކުރުމުގެ ފުރުޞަތު މި އެޕުން ލިބިގެންދެއެވެ.

އޮޑިގޯއިން މަޢުލޫމާތު ދޭ ގޮތުގައި، މި ޕްލެޓްފޯމް މެދުވެރިކޮށް ބައިވެރިވާ މީހުންގެ ޢަދަދަށާއި ވަގުތަށް ބަލައި ހާފް-ޑޭ، ފުލް-ޑޭ ނުވަތަ އިރުއޮއްސޭ ވަގުތުގެ ދަތުރުތައް ފިލްޓަރކޮށްލެވޭނެއެވެ. އަދި ބުކިން ހެދުމަށްފަހު އުޅަނދުގެ ކެޕްޓަނާ ސީދާ މުޢާމަލާތްކޮށް، ރާއްޖޭގައި ބޭނުންކުރާ ލޯކަލް ޕޭމަންޓް މެތަޑްތައް މެދުވެރިކޮށް ފައިސާ ދެއްކޭނެ އިންތިޒާމުވެސް ވަނީ ހަމަޖައްސައިފައެވެ. މި އެޕްގައި ހިމަނާފައިވަނީ އިތުބާރު ހުރި ކެޕްޓަނުންނާއި އޮޕަރޭޓަރުންނެވެ.

މަސްދަތުރުތަކުގެ އިތުރުން ސްނޯކްލިންގ، ފިނޮޅުތަކަށް ދިއުމާއި، ސަންސެޓް ކްރޫޒް އަދި އައިލެންޑް ހޮޕިންގ ފަދަ ހިތްގައިމު ހަރަކާތްތައް ވެސް މި އެޕުން ބުކްކުރެވެއެވެ. ހަމައެއާއެކު، މިއީ އުޅަނދުފަހަރުގެ ވެރިންނަށް ވިޔަފާރި ފުޅާކުރުމަށް ލިބުނު ރަނުގެ ފުރުޞަތެކެވެ. މީގެއިތުރުން މި ޕްލެޓްފޯމްގައި މަސްވެރިކަމާއި ޑައިވިންގ ސާމާނު ވިއްކުމަށް ޚާއްޞަ މެރިން މާކެޓްޕްލޭސްއެއްވެސް ވަނީ ހިމަނާފައެވެ.

އެޕަލް އެޕް ސްޓޯރ އަދި ގޫގަލް ޕްލޭ ސްޓޯރުން މިހާރު ޑައުންލޯޑް ކުރެވެން ހުރި އޮޑިގޯ އެޕްލިކޭޝަންގެ އެންމެ ފަހުގެ އަޕްޑޭޓުގައި މޫސުމާ ބެހޭ މަޢުލޫމާތާއި، ކަނޑުގެ ޙާލަތު އަންގައިދޭ މެރިން މެޕް ވެސް ވަނީ ހިމަނައިފައެވެ.

އޮޑިގޯ ކުންފުނިން ބުނި ގޮތުގައި އެ ކުންފުނީގެ މައިގަނޑު އަމާޒަކީ ދިވެހި ކަނޑުތަކުގެ ޙަޤީޤީ ތަޖުރިބާ އެންމެ ފަސޭހަކަމާއެކު ފޯރުކޮށްދިނުމާއެކު، ރަށްރަށުގެ ކެޕްޓަނުންނާއި، މަސްވެރި މުޖުތަމަޢުތަކުގެ އިތުރުން ކުދި އަދި މެދުފަންތީގެ މެރިން ވިޔަފާރިތަކަށް އެހީތެރިވެ ކުރިއެރުވުމެވެ.

އޮޑިގޯ އެޕް މި ލިންކް މެދުވެރިކޮށް ޑައުންލޯޑު ކޮށްލެވޭނެއެވެ. https://odigo.mv/app