އައްޑޫގައި ހިތުގެ އޮޕަރޭޝަންތަކެއް ކާމިޔާބުކަމާއެކު ފުރިހަމަކޮށް، ދެކުނުގެ ކާޑިއަކް ފަރުވާއަށް ބޮޑު ކުރިއެރުމެއް ހޯދައިފި

ދެކުނުގެ އަތޮޅުތަކުގައި ދެވޭ ހިތުގެ ބަލިތަކުގެ ފަރުވާ އިތުރަށް ހަރުދަނާކޮށް ފުޅާކުރުމުގެ ގޮތުން އައްޑޫ އިކުއެޓޯރިއަލް ހޮސްޕިޓަލް (އޭއީއެޗް) އާއި އައިޖީއެމްއެޗްގެ ނޭޝަނަލް ކާޑިއަކް ސެންޓަރު (އެންސީސީ) ގުޅިގެން ކާމިޔާބު މަސައްކަތްތަކެއް ކޮށްފިއެވެ.

އައިޖީއެމްއެޗުން ބުނީ ދާދިފަހުން އައްޑޫ އިކުއެޓޯރިއަލް ހޮސްޕިޓަލުގައި ކުރިއަށްދިޔަ ކާޑިއަކް ސާވިސް ސެޝަންތަކުގައި، އޭއީއެޗް އަދި ނޭޝަނަލް ކާޑިއަކް ސެންޓަރުގެ ޓީމުން ވަނީ 3 ކޮރޯނަރީ އެންޖިއޯގްރާމް އަދި 2 މަލްޓިވެސަލް ކޮރޯނަރީ އިންޓަވެންޝަން ކާމިޔާބުކަމާއެކު ފުރިހަމަކޮށްފައިކަމަށެވެ.

އޭއީއެޗްގައި ކުރިއަށްދިޔަ ކާޑިއަކް ސާވިސް ސެޝަންތަކުގެ ތެރެއިން، އެ ހޮސްޕިޓަލާއި ނޭޝަނަލް ކާޑިއަކް ސެންޓަރުގެ ޓީމު ގުޅިގެން ވަނީ ކާމިޔާބު ފަސް އޮޕަރޭޝަނެއް ފުރިހަމަކޮށްފައެވެ. މީގެ ތެރޭގައި ތިން ކޮރޯނަރީ އެންޖިއޯގްރާމްގެ އިތުރުން ދެ "މަލްޓިވެސަލް ކޮރޯނަރީ އިންޓަވެންޝަން" ހިމެނެއެވެ.

މި ކުރިއެރުމަކީ އައްޑޫ އިކުއެޓޯރިއަލް ހޮސްޕިޓަލުގައި ހިތުގެ ބަލިތަކަށް ދެވޭ ފަރުވާގެ ފެންވަރު މަތިކޮށް، ދެމެހެއްޓެނިވި ގޮތެއްގައި މި ހިދުމަތް ދިނުމަށް ކުރެވޭ މަސައްކަތުގެ ތެރެއިން ލިބުނު މުހިންމު ކާމިޔާބީއެކެވެ. މި މަސައްކަތްތައް ކުރިއަށް ގެންގޮސްފައިވަނީ އޭއީއެޗްގެ އިންޓަވެންޝަނަލް ކާޑިއޮލޮޖީ ޓީމާއި، މާލެއިން ދިޔަ އެންސީސީގެ ތަޖުރިބާކާރު ޓީމާ ދެމެދު އޮތް ގާތް ގުޅުމުގެ ތެރެއިންނެވެ.

މިފަދަ ޕްރޮގްރާމްތަކުގެ މައިގަނޑު މަގްސަދަކީ ސަރަހައްދީ ފެންވަރުގައި ފެންވަރު ރަނގަޅު ހިތުގެ ފަރުވާ ފޯރުކޮށްދީ، ބަލިމީހުންނަށް ލުއިފަސޭހަކޮށްދިނުމެވެ. ހަމައެއާއެކު، މި މަސައްކަތުގެ ސަބަބުން ރާއްޖޭގެ ދެކުނުގައި މަސައްކަތްކުރާ ސިއްހީ މާހިރުންގެ ހުނަރާއި ގާބިލުކަން އިތުރުވެ، ސަރަހައްދީ ސިއްހީ ނިޒާމު އިތުރަށް ވަރުގަދަވެގެންދާނެއެވެ.