އަލް މަވާސީއަށް އިސްރާއީލުން ދިން ހަމަލާއިން ހަމާސްގެ އަސްކަރީ ވެރިޔާ ސަލާމަތްވި

ހޮނިހިރު ދުވަހު އިސްރާއީލު އަސްކަރިއްޔާއިން އަލް މަވާސީއަށް ދިން ހަމަލާއިން ހަމާސްގެ އަސްކަރީ ވިންގު, ޤައްސާމް ބްރިގޭޑްގެ ވެރިޔާ މުހައްމަދު ދިއެފް ސަލާމަތްވިކަމަށް ހަމާސްގެ އޮފިޝަލުންނާ ހަވާލާދީ ރިޕޯޓްތައް ބުނެފިއެވެ. 

ނަން ހާމަނުކޮށް ހަމާސްގެ އޮފިޝަލަކު އޭއެފްޕީއަށް ދިން އިންޓަރވިއުއެއްގައި ބުނެފައިވަނީ މުހައްމަދު ދިއެފްގެ ހާލު ރަނގަޅުކަމަށާއި މިވަގުތުވެސް ހަމާސް އިން ކުރިޔަށްގެންދާ އޮޕަރޭޝަން ގާތުން ބަލަމުން އަންނަކަމަށެވެ. 

ސޭފް ޒޯނެއްކަމުގައި އިސްރާއީލު އަސްކަރިއްޔާއިން ކަނޑައަޅާފައިވާ އަލް މަވާސީއަށް ހަމަލާދިނީ އެސަރަހައްދުގައި މުހައްމަދު ދިއެފް ހުރުމުންކަމަށް އިސްރާއީލު އަސްކަރިއްޔާއިން ބުނެއެވެ. އެހަމަލާގައި މަދުވެގެން 90 މީހުންގެ ފުރާނަ ވަނީ ގެއްލިފައެވެ. ހަމާސް އިން ވަނީ އިސްރާއީލުގެ ތުހުމަތުތައް ދޮގުކޮށް އެއީ އިސްރާއީލުން ނަސްލު ނައްތާލުމަށް ހިންގަމުންދާ ގަތުލުއާންމަށް އިތުރުވި ބޮޅެއްކަމަށް ބުނެފައެވެ. 

މުހައްމަދު ދިއެފް އަކީ އިސްރާއީލުން އެންމެ ބޭނުންވާ ހަމާސްގެ ލީޑަރުންގެ ތެރެއިން އެކަކެވެ. މުހައްމަދު ދިއެފް މަރާލުމަށް އިސްރާއީލުން ވަނީ މީގެކުރިންވެސް އެތައް ފަހަރަކު ހަމަލާދީފައެވެ. 

ދިއެފް އަކީ ހަމާސްގެ އަސްކަރީ ވިންގު އުފެއްދުމުގައި އެންމެ އިސްކޮށް ހަރަކާތްތެރިވި އެކަކެވެ. ހަމާސްގެ އަސްކަރީ ވިންގް ، ޤައްސާމް ބްރިގޭޑް 1990 ގައި އުފެދުނީއްސުރެ 20 އަހަރަށް ވުރެ ގިނަ އަހަރު ޤައްސާމް ބްރިގޭޑް ހިންގުމުގައި އަންނަނީ ހަރަކާތްތެރިވަމުންނެވެ. 

އޮކްޓޯބަރ މަހުގެ 7 ވަނަ ދުވަހު ހަމާސް އިން އިސްރާއީލަށް ކުއްލި ގޮތަކަށް ދިން ހަމަލާގެ ފަހަތުގައި ވަނީ ހަމާސްގެ ޣައްޒާގައި ހުންނަ އެންމެ އިސް ލީޑަރު ޔަހުޔާ ސިންވާރު އަދި ޤައްސާމް ބްރިގޭޑްގެ ވެރިޔާ މުހައްމަދު ދިއެފްކަމަށް އިސްރާއީލުން ގަބޫލުކުރެއެވެ. 

ބެލެވޭ ގޮތުގައި އިސްރާއީލުން އޭނާ މަރާލުމަށް ދިން އެތައް ހަމަލާތަކަށްފަހު ދިއެފް މިހާރު ހުންނަނީ ވާގިނެތިފައެވެ. އޭނާ އާންމުންގެ ތެރެއިން ނުފެންނަތާ އެތައް އަހަރެއް ވަނީ ވެފައެވެ. އަދި އިންޓަރނެޓުންވެސް ފެންނަން ހުންނަނީ އޭނާގެ މަދު ފޮޓޯތަކެކެވެ. އޮކްޓޯބަރ މަހުގެ 7 ވަނަ ދުވަހުގެ ހެނދުނު ހަމާސް އިން ވަނީ ދިއެފްގެ އޯޑިއޯ ރިކޯޑިންގ އެއް ޕޯސްޓްކޮށްފައެވެ. އެ ރިކޯޑިންގ ގައި ދިއެފް އަލް އަޤްސާ ފްލަޑް އޮޕަރޭޝަން ހިންގާކަން ހާމަކުރެއެވެ.