އިންޖިނޭރުންގެ ދުވަސް ފާހަގަކުރުމަށް ރާއްޖޭގެ 164 ރަށެއްގައި ދަރިވަރުންނަށް ޚާއްޞަ ސައިޓް ވިޒިޓްތަކެއް ބާއްވައިފި

ދިވެހިރާއްޖޭގެ އިންޖިނޭރުންގެ ދުވަހާ ގުޅިގެން، ރާއްޖޭގެ އެކި ކަންކޮޅުތަކުގައި ތަޢުލީމު ޙާޞިލުކުރަމުންދާ ދަރިވަރުންނަށް އަމާޒުކޮށްގެން ޚާއްޞަ ސައިޓް ވިޒިޓްތަކެއް މިއަދު ކާމިޔާބުކަމާއެކު ކުރިއަށްގެންގޮސްފިއެވެ.

މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން މަޢުލޫމާތު ދެއްވި ގޮތުގައި، މިއަދު ހެނދުނު 9:00 ގައި ފެށި މި ހަރަކާތް ސިޓީތައް ހިމެނޭހެން ރާއްޖޭގެ 164 ރަށެއްގައި ވަނީ ބާއްވާފައެވެ.

މި ޕްރޮގްރާމުގެ ދަށުން އަތޮޅުތަކުގެ ސްކޫލްތަކުގެ ދަރިވަރުން ވަނީ ފެނަކަ ކޯޕަރޭޝަން އަދި ސްޓެލްކޯގެ އިންޖީނުގެތަކުގެ އިތުރުން އެމް.ޑަބްލިޔު.އެސް.ސީގެ ފެސިލިޓީތަކަށާއި، އެމްޓީސީސީން ހިންގަމުންދާ އުމްރާނީ ތަރައްޤީގެ އެކި މަޝްރޫޢުތަކުގެ ސައިޓުތަކަށް ޒިޔާރަތްކޮށްފައެވެ. މި ޒިޔާރަތްތަކުގައި އެ ތަންތަނުގައި އިންޖިނިއަރިންގ މަސައްކަތްތައް ހިނގަމުންދާ ގޮތް ދަރިވަރުންނަށް ޢަމަލީ ގޮތުން ކިޔައިދީ، މަސައްކަތާ ގުޅޭ މަޢުލޫމާތު ސާފުކުރުމާއި ސުވާލުކުރުމުގެ ފުރުޞަތު ވަނީ ފަހިކޮށްދީފައެވެ.

މީގެއިތުރުން، މާލެ ސަރަހައްދުގެ ސްކޫލްތަކުގެ ދަރިވަރުންނަށް ޚާއްޞަކޮށްގެން ތިލަމާލެ ބްރިޖް މަޝްރޫޢުގެ ސައިޓަށް ޒިޔާރަތްކުރުމުގެ ފުރުޞަތުވެސް ވަނީ ދީފައެވެ. ދެ ސެޝަނަކަށް ބަހާލައިގެން ކުރިއަށްގެންދިޔަ މި ވިޒިޓުގައި ސެންޓަރ ފޮރ ހަޔަރ އެޑިއުކޭޝަން ސެންޓަރ (ސީއެޗްއެސްއީ) އަދި މާލެ ވޮކޭޝަނަލް ހައި ސްކޫލުގެ 45 ދަރިވަރުން ބައިވެރިވެފައިވެއެވެ.

މިނިސްޓްރީން ހާމަކުރި ގޮތުގައި، މިފަދަ ސައިޓް ވިޒިޓްތަކެއް އިންތިޒާމުކުރުމުގެ މައިގަނޑު މަޤްޞަދަކީ ދަރިވަރުން އިންޖިނިއަރިންގ ދާއިރާއަށް އަހުލުވެރިކޮށް، އެ ދާއިރާއިން ކުރިއަށްދިއުމަށް ބޭނުންވާ މުހިންމު މަޢުލޫމާތުތައް ފޯރުކޮށްދިނުމެވެ.