ޒަކާތު ފަންޑުގެ އެހީގައި ބޯންމެރޯ ޓްރާންސްޕްލާންޓް ހެދުމަށް ތެލެސީމިއާ ހަ ކުއްޖަކު އިންޑިއާއަށް ފުރަނީ

ބޯންމެރޯ ޓްރާންސްޕްލާންޓް ހެދުމަށް މާލީގޮތުން ތަނަވަސްކަން ނެތް ތެލެސީމިއާ ހަ ކުއްޖަކު، ޒަކާތު ފަންޑުގެ ދީލަތި އެހީގައި ފަރުވާ ހޯދުމަށް އިންޑިއާއަށް ފުރުމަށް ހަމަޖެހިއްޖެއެވެ. މިއީ މިއަހަރުގެ ތެރޭގައި ޒަކާތު ފަންޑުގެ އެހީގައި ރާއްޖޭން ބޭރަށް ފަރުވާއަށް ފޮނުވާ ފުރަތަމަ ގްރޫޕެވެ.

މި ކުދިން ފުރުމުގެ މުނާސަބަތުގައި އިއްޔެ ބޭއްވި ޚާއްޞަ ރަސްމިއްޔާތެއްގައި މިނިސްޓަރ އޮފް ހެލްތު، ފެމިލީ އެންޑް ވެލްފެއަރ އަލްފާޟިލާ ގީލާ ޢަލީ އާއި، މޯލްޑިވްސް ޒަކާތު ހައުސްގެ ޑިރެކްޓަރ ޖެނެރަލް އައްޝައިޚް އިމްތިޠާއު ޢައްބާހާއި، މާލޭ ސިޓީ ގްރޫޕް އޮފް ހޮސްޕިޓަލްސް (އެމް.ސީ.ޖީ.އެޗް)ގެ ސީ.އީ.އޯ އަލްފާޟިލް އިބްރާހީމް ޢަބަދުއްރައްޒާޤު ޙަލީމް ބައިވެރިވެވަޑައިގެންނެވިއެވެ. މީގެ އިތުރުން ތެލެސީމިއާ ސެންޓަރުގެ އިސްވެރިންނާއި ފުރާ ކުދިންގެ އާއިލާތަކުން ވެސް މި ރަސްމިއްޔާތުގައި ބައިވެރިވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ހެލްތު މިނިސްޓަރާއި އެމް.ސީ.ޖީ.އެޗްގެ ސީ.އީ.އޯ ވަނީ މި ފަރުވާގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި ޒަކާތު ހައުސްގެ ޑިރެކްޓަރ ޖެނެރަލް ވަނީ ޒަކާތު ފަންޑުން ފޯރުކޮށްދޭ މާލީ އެހީތެރިކަމާ ގުޅޭ ތަފްސީލުތައް ހިއްސާކުރައްވާފައެވެ.

ޒަކާތު ހައުސްއިން ވަނީ ޝަރުތު ހަމަވާ ކުދިންގެ ބޯންމެރޯ ޓްރާންސްޕްލާންޓްގެ ޚަރަދު ހަމަޖެއްސުމަށްޓަކައި 2.5 މިލިއަން ރުފިޔާ މިދިޔަ މަހު ނޭޝަނަލް ސޯޝަލް ޕްރޮޓެކްޝަން އެޖެންސީ (އެން.އެސް.ޕީ.އޭ) އަށް ޖަމާކޮށްފައެވެ. މި އެހީއަކީ 21 ފެބްރުއަރީ 2024 ގައި އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ވެވުނު އެއްބަސްވުމުގެ ދަށުން ދެވޭ އެހީއެކެވެ. ފާހަގަކޮށްލެވޭ ގޮތުގައި 2014 ވަނަ އަހަރުން ފެށިގެން ޒަކާތު ފަންޑުން އަންނަނީ މިފަދަ އެހީތެރިކަން ފޯރުކޮށްދެމުންނެވެ.

ބޯންމެރޯ ޓްރާންސްޕްލާންޓަކީ ތެލެސީމިއާ ބައްޔަށް އޮތް ހަމައެކަނި ދާއިމީ ފަރުވާއެވެ. މި ފަރުވާގެ ސަބަބުން ކުދިން ގަވާއިދުން ލޭ އެޅުމުން ދުރުވެ، ދުޅަހެޔޮ އާންމު ދިރިއުޅުމަކަށް އެނބުރި ދިއުމުގެ ފުރުސަތު ލިބިގެންދެއެވެ.

މިއަހަރު ޖުމުލަ 10 ކުއްޖަކު ފަރުވާއަށް ފޮނުވުމަށް ހަމަޖެހިފައިވާއިރު، ފުރަތަމަ ބުރުގައި މި ފުރާ ހަ ކުދިންގެ އިތުރުން، ބާކީ ތިބި ހަތަރު ކުދިން އިދާރީ ކަންކަން ނިމުމުން އާސަންދައިގެ ދަށުން އިންޑިއާގެ ހޮސްޕިޓަލްތަކަށް ފޮނުވުމުގެ މަސައްކަތް މިހާރު ދަނީ ކުރެވެމުންނެވެ.

ސަރުކާރުން ހާމަކުރައްވާފައިވާ ގޮތުގައި، 2024 ވަނަ އަހަރުން ފެށިގެން މިހާތަނަށް ތެލެސީމިއާ ކުދިންގެ ބޯންމެރޯ ޓްރާންސްޕްލާންޓަށް ޒަކާތު ފަންޑުން 23 މިލިއަނަށްވުރެ ގިނަ ރުފިޔާ ވަނީ ޚަރަދުކޮށްފައެވެ. މިއީ މިފަދަ ކުދިންނަށް އުއްމީދީ މުސްތަޤްބަލެއް ހޯދައިދިނުމަށް ސަރުކާރުން ކުރައްވަމުންދާ މުހިންމު މަސައްކަތެކެވެ.