ސިންގަލް-ޔޫސް ޕްލާސްޓިކްގެ ބައެއް ބާވަތްތައް މަނާކުރުން ފަސްކޮށް، ޤަރާރަށް ބަދަލުތަކެއް ގެނެސްފި

ދިވެހިރާއްޖެއަށް އެތެރެކުރުމާއި، އުފެއްދުމާއި ބާޒާރަށް ނެރުން މަނާކުރާ، ތިމާވެށްޓަށް ގެއްލުންދޭ ސިންގަލް-ޔޫސް ޕްލާސްޓިކުގެ ބާވަތްތަކުގެ ލިސްޓަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މުހިންމު އިޞްލާޙުތަކެއް ގެންނަވައިފިއެވެ. މި ބަދަލުތައް ގެންނަވާފައިވަނީ މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ މަޝްވަރާގެ މަތީންނެވެ.

މި އިޞްލާޙުގެ ދަށުން، އެއްފަހަރު ބޭނުންކޮށްފައި އުކައިލާ ޒާތުގެ ޕްލާސްޓިކް ހޮޅި ރާއްޖެއަށް އެތެރެކުރުން މަނާކުރާ ތާރީޚު 1 ޖޫން 2031 އަށް ވަނީ ފަސްކޮށްފައެވެ. އަދި މިފަދަ ހޮޅި ރާއްޖޭގައި އުފެއްދުމާއި ބާޒާރަށް ނެރުން މަނާކުރާ ތާރީޚު 19 ޑިސެންބަރު 2031 އަށް ވަނީ ބަދަލުކުރައްވާފައެވެ.

މީގެއިތުރުން، 1 ލީޓަރާއި 1 ލީޓަރަށް ވުރެ ކުދި (500 މިލިލީޓަރާ ދެމެދުގެ) ޕްލާސްޓިކް ފުޅީގައި ބަންދުކޮށްފައި ހުންނަ ފެން ރާއްޖެއަށް އެތެރެކުރުމާއި އުފެއްދުން މަނާކުރާ ތާރީޚު 1 ޑިސެންބަރު 2029 އަށް، އަދި ބާޒާރަށް ނެރުން މަނާކުރާ ތާރީޚު 1 ޖޫން 2030 އަށް ވަނީ ފަސްކުރައްވާފައެވެ.

ހަމައެއާއެކު، ލިސްޓަށް ގެނެވުނު އަނެއް ބަދަލަކީ، 500 މިލިލީޓަރުގެ ބަދަލުގައި 250 މިލިލީޓަރަށް ވުރެ ކުދި ޕްލާސްޓިކް ފުޅީގައި ބަންދުކޮށްފައި ހުންނަ ތައްޔާރީ ބުއިންތައް (ފެން ފިޔަވައި) މިއަދުން ފެށިގެން ރާއްޖެއަށް އެތެރެކުރުމާއި، އުފެއްދުމާއި، އަދި ބާޒާރަށް ނެރުން މަނާކުރުމެވެ.

ތިމާވެށްޓަށް ގެއްލުންދޭ ސިންގަލް-ޔޫސް ޕްލާސްޓިކުގެ ލިސްޓަށް ގެންނެވި މި އިޞްލާޙުތައް ހިމެނޭ ރައީސުލްޖުމްހޫރިއްޔާގެ ޤަރާރު މިހާރު ވަނީ ދިވެހި ސަރުކާރުގެ ގެޒެޓުގައި ޝާއިޢުކުރައްވާފައެވެ.