އަޒަރުބައިޖާންގެ މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ތަހުނިޔާ ފޮނުއްވައިފި
އަޒަރުބައިޖާންގެ މިނިވަން ދުވަހުގެ އުފާވެރި މުނާސަބަތުގައި، އެ ގައުމުގެ ރައީސަށާއި ސަރުކާރަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަހުނިޔާ ފޮނުއްވައިފިއެވެ.
ސޯޝަލް މީޑިއާ ޕްލެޓްފޯމް 'އެކްސް' މެދުވެރިކުރައްވައި ރައީސުލްޖުމްހޫރިއްޔާ ފޮނުއްވި މެސެޖުގައި، އަޒަރުބައިޖާންގެ ރައީސް އިލްހާމް އަލީޔޭވް އަށާއި، ބޮޑުވަޒީރު އަލީ އަސަދޯވްގެ އިތުރުން އެ ގައުމުގެ ސަރުކާރަށާއި ރައްޔިތުންނަށް ވަނީ އިޚްލާޞްތެރި ތަހުނިޔާއާއި ހެޔޮއެދުންތައް ފޮނުއްވާފައެވެ.
ރައީސުލްޖުމްހޫރިއްޔާގެ މެސެޖުގައި ފާހަގަކުރެއްވި ގޮތުގައި، މިނިވަންކަން ހާސިލްކުރި ފަހުން އަޒަރުބައިޖާނުން ވަނީ އެ ގައުމުގެ ރައްޔިތުންގެ އުންމީދުތަކާ އެއްގޮތަށް ތަރައްގީގެ މަގުގައި ބޮޑެތި ކުރިއެރުންތަކެއް ހޯދާފައެވެ. އަދި ކުރިއަށް އޮތް ތަނުގައި ވެސް އެ ގައުމަށް ފާގަތި ދުވަސްތަކަކަށް އެދިވަޑައިގަންނަވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، ދިވެހިރާއްޖެއާއި އަޒަރުބައިޖާނާ ދެމެދު އޮތް ގުޅުމުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ، ފާއިތުވި އަހަރުތަކުގައި ދެ ގައުމުގެ ދެމެދުގައި އޮތް ގުޅުން ބަދަހިވެ، ވިޔަފާރިއާއި ރައްޔިތުންގެ މެދުގައި އޮންނަ ގުޅުން ފުޅާކުރުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. މި ދާއިރާތަކުންނާއި އެ ނޫންވެސް ދާއިރާތަކުން ދެ ގައުމުގެ އެއްބާރުލުން އިތުރަށް ފުޅާވަމުންދާތީ އެކަމާ އުފާކުރައްވާ ކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.
އަޒަރުބައިޖާނުން ކޮންމެ އަހަރެއްގެ މޭ މަހުގެ 28 ވަނަ ދުވަސް ފާހަގަކުރަނީ އެ ގައުމުގެ މިނިވަން ދުވަހުގެ ގޮތުގައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
