ޝަމްޢާން ކުރަނީ އެއްވެސް އަސާސެއް ނެތް ދޮގު ތުހުމަތުތަކެއް: މިނިސްޓަރު އިޙްސާން
މިގްރޭޝަންގެ ކުރީގެ ކޮންޓްރޯލާ ޖެނެރަލް މުޙައްމަދު ޝަމްޢާން ވަޙީދު ސަރުކާރާއި މުއައްސަސާތަކަށް އަމާޒުކޮށް ކުރަމުންދާ ތުހުމަތުތަކަކީ އެއްވެސް ހަގީގަތެއް ނެތް، ސާބިތު ނުހިފޭ ދޮގު ވާހަކަތަކެއް ކަމަށް ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.
މިނިސްޓަރ އިޙްސާން މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ޝަމްޢާން ތަކުރާރުކޮށް ކުރަމުންދާ ތުހުމަތުތަކާ ގުޅޭ އެއްވެސް ހެއްކެއް ނުވަތަ ޤަރީނާއެއް ނެތް ކަމަށެވެ. އަދި އޭނާ އެ ހަދަނީ ދޮގުކަން މީގެ ކުރިންވެސް މީޑިއާތަކުގައި ސާފުކޮށް ހާމަކުރައްވާފައިވާނެ ކަމަށް މިނިސްޓަރ ފާހަގަކުރެއްވިއެވެ.
މީގެ އިތުރުން، އޭނާ ފްރޭމްކޮށްފައިވާ ކަމަށް ބުނެ ދައްކާ ވާހަކަތަކަކީވެސް އެއްވެސް އަސާސެއް އޮތް ވާހަކަތަކެއް ނޫން ކަމަށް މިނިސްޓަރ ވިދާޅުވިއެވެ. މިނިސްޓަރ އިޙްސާން ވިދާޅުވި ގޮތުގައި، މި މައްސަލާގައި ފުލުހުން ހޯދާފައިވާ ހެކިތަކުން އެކަން ވަރަށް ސާފުކޮށް އެނގެން އެބައޮތެވެ.
"މި މައްސަލާގައި ކަންހިނގާފައިވާ ގޮތް ތަފްސީލުކޮށް ރައްޔިތުންނަށް ސާފުކޮށްދިނުމަށް އަޅުގަނޑުވާނީ ފުލުހުންގެ މުއައްސަސާގައި އެދިފައި،" މިނިސްޓަރގެ ޕޯސްޓުގައި ލިޔުއްވާފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
