ޕާކިސްތާނުގެ ބޮޑުވަޒީރުގެ ނައިބު ރައީސް މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައެްވައިފި

ޕާކިސްތާނުގެ ބޮޑުވަޒީރުގެ ނައިބު އަދި ޚާރިޖީ ވަޒީރު، ސެނެޓަރ މުޙައްމަދު އިސްޙާޤު ދާރު، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހަށް މިއަދު އިސްލާމްއާބާދުގައި އިޙުތިރާމުގެ ޒިޔާރަތެއް ކުރައްވައިފިއެވެ.

ބޮޑުވަޒީރުގެ ނައިބު އަދި ޚާރިޖީ ވަޒީރު ވަނީ ޕާކިސްތާނުގެ ރައީސް އާޞިފް ޢަލީ ޒަރުދާރީ އާއި ބޮޑުވަޒީރު މުޙައްމަދު ޝަހްބާޒް ޝަރީފްގެ ފަރާތްޕުޅުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ހޫނު މަރުޙަބާއަކާއި ހެޔޮއެދުންތައް އަރިސްކުރައްވާފައެވެ. އަދި ރައީސުލްޖުމްހޫރިއްޔާއަށާއި އެމަނިކުފާނުގެ އަރިހުގައި ވަޑައިގެންނެވި ވަފުދުގެ ބޭފުޅުންނަށް ޕާކިސްތާނުން ހޫނު މަރުޙަބާއެއް ދެންނެވިއެވެ.

ދިވެހިރާއްޖެއާއެކު އޮތް ޒަމާންވީ އަޚުވަންތަ ގުޅުން ދެމެހެއްޓުމަށް ޕާކިސްތާނުން ދޭ އަހައްމިއްޔަތުކަން ތަކުރާރުކުރައްވަމުން، ދެޤައުމުގެ ދެމެދުގައިވާ ގުޅުން އިތުރަށް ފުޅާކުރުމުގެ މުހިންމުކަން ބޮޑުވަޒީރުގެ ނައިބު އަދި ޚާރިޖީ ވަޒީރު ފާހަގަކުރެއްވިއެވެ. ޚާއްޞަކޮށް ވިޔަފާރިއާއި، އިންވެސްޓްމަންޓާއި، ތަޢުލީމާއި، މޫސުމަށް އަންނަ ބަދަލުތަކާއި ފަތުރުވެރިކަމުގެ ދާއިރާއިން އެއްބާރުލުން އިތުރުކުރުމަށް އަލިއަޅުއްވާލެއްވިއެވެ.

މޯލްޑިވްސް-ޕާކިސްތާން ބިޒްނަސް ފޯރަމްގައި ދިވެހި ވިޔަފާރިވެރިންގެ ވަފުދުން ބައިވެރިވުމަށް މަރުޙަބާ ދަންނަވަމުން، ވިޔަފާރިތަކުގެ މެދުގައި ބޭއްވޭ ބައްދަލުވުންތަކުގެ ސަބަބުން (ބީ.ޓޫ.ބީ އެންގޭޖްމަންޓްތަކުގެ ސަބަބުން) ވިޔަފާރިއާއި އިންވެސްޓްމަންޓްގެ ޙަޤީޤީ ފުރުޞަތުތަކެއް ފަހިވެގެންދާނެ ކަމަށް އުންމީދުކުރައްވާ ކަމަށް ބޮޑުވަޒީރުގެ ނައިބު އަދި ޚާރިޖީ ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެމަނިކުފާނަށާއި އަރިހުގައި ވަޑައިގެންނެވި ވަފުދަށް ވިދާޅުވި ހޫނު މަރުޙަބާއަށާއި އަދާކުރެއްވި މެހެމާންދާރީއަށްޓަކައި ޝުކުރު އަދާކުރައްވާފައެވެ. އަދި ޕާކިސްތާނާއެކު އޮތް ގާތް ގުޅުން އިތުރަށް ބަދަހިކުރުމަށާއި، ދެފަރާތަށްވެސް ފައިދާހުރި އައު ދާއިރާތަކުން ގުޅުން ބަދަހިކުރުމަށް ރާއްޖެއިން އެދޭކަން އެމަނިކުފާނު ހާމަކުރެއްވިއެވެ.