ރާއްޖޭގެ ޒުވާނުންނަށް ގިނަ ފުރުސަތުތަކެއް ހޯދުމަށް ދަތުރުފުޅުގެ ތެރެއިން މަޝްވަރާކުރެވުނު: ރައީސް ޑރ. މުޢިއްޒު

ޕާކިސްތާނަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ރާއްޖޭގެ ޒުވާނުންނަށް އެކި ދާއިރާތަކުން ގިނަ ފުރުސަތުތަކެއް ފަހިކޮށްދިނުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޕާކިސްތާނުގެ ބޮޑުވަޒީރު ޝެހްބާޒް ޝަރީފްގެ ރަސްމީ ގެކޮޅުގައި ދެ ޤައުމުގެ ދެމެދުގައި 20 ފަހުމުނާމާއެއްގައި ސޮއިކުރުމަށްފަހު، މިއަދު މެންދުރުފަހު ދެއްވި ގުޅިފައިވާ ބަޔާނުގައި ރައީސް ވިދާޅުވީ، ދެ ޤައުމުގެ މުސްތަޤުބަލާ ގުޅިފައިވާ ޒުވާނުން ބާރުވެރިކުރުވުމަކީ ޚާއްޞަ އިސްކަމެއް ދެއްވާ ކަމެއް ކަމަށެވެ. ޕާކިސްތާނަކީ ޒަމާނުއްސުރެ ރާއްޖޭގެ ދަރިވަރުންނަށާއި، ކުޅިވަރު ކުޅުންތެރިންނާއި، ކޯޗުން އަދި އެކި ދާއިރާތަކުގެ ޒުވާން ޕްރޮފެޝަނަލުންނަށް ސްކޮލަޝިޕާއި ތަމްރީނުގެ އަގުހުރި ފުރުސަތުތައް ފަހިކޮށްދެމުން އަންނަ ޤައުމެއްކަން އެމަނިކުފާނު ފާހަގަކުރެއްވިއެވެ.

ރައީސް ވިދާޅުވީ ދެ ޤައުމުގެ ދެމެދުގައި ހިންގާ ޔޫތު އެކްސްޗޭންޖް ޕްރޮގްރާމް އިތުރަށް ހަރުދަނާކޮށް، ހުނަރު ތަރައްޤީކުރުމާއި، ވިޔަފާރިވެރިކަން ކުރިއެރުވުމާއި، އީޖާދީ ވިސްނުން އަދި ލީޑަރޝިޕްގެ ދާއިރާއިން އެއްބާރުލުން ފުޅާކުރުމަށް ދެބޭފުޅުން އެއްބަސްވެވަޑައިގެންނެވި ކަމަށެވެ. މީގެއިތުރުން، އާޓިފިޝަލް އިންޓެލިޖެންސް (AI) އާއި ޑިޖިޓަލައިޒޭޝަން އަދި ކުރިމަގުގެ އައު ޓެކްނޮލޮޖީތަކަށް ދިވެހި ޒުވާނުން އަހުލުވެރިކުރުވުމަށް އިތުރު ދޮރުތައް ހުޅުވައިދިނުމާ މެދު މަޝްވަރާކުރެއްވި ކަމަށްވެސް ވިދާޅުވިއެވެ.

ޞިއްޙީ ދާއިރާއިން ދިވެހި ޒުވާނުންނާއި ޑޮކްޓަރުންނަށް ފުރުސަތުތައް ފަހިކޮށްދިނުމުގެ މުހިންމުކަން ފާހަގަކުރައްވަމުން، ޕާކިސްތާން ޓެކްނިކަލް އެސިސްޓެންސް ޕްރޮގްރާމްގެ ދަށުން އެމްބީބީއެސް (MBBS) ޖާގަތައް އިތުރުކުރުމަށާއި، މެޑިކަލް ގްރެޖުއޭޓުންނަށް ޕާކިސްތާނުގައި އިންޓާންޝިޕް ފުރިހަމަކުރުމުގެ ފުރުސަތު ހޯދުމާ ގުޅޭގޮތުން ވާހަކަދެކެވުނު ކަމަށް ރައީސް ވިދާޅުވިއެވެ. އެމަނިކުފާނު ސިފަކުރެއްވި ގޮތުގައި މިއީ ހަމައެކަނި މުއައްސަސާތަކަށް ކުރެވޭ އިންވެސްޓްމަންޓެއް ނޫން ކަމަށާއި، މިއީ މީހުން ބިނާކުރުމަށާއި ޤައުމުގެ މުސްތަޤުބަލުގެ ޤާބިލުކަން އިތުރުކުރުމަށް ކުރެވޭ މުހިންމު އިންވެސްޓްމަންޓެކެވެ.

މި ބައްދަލުވުމުގައި ތިމާވެށީގެ ގޮންޖެހުންތަކާއި މޫސުމީ ބަދަލުތަކާ ގުޅޭގޮތުންވެސް މަޝްވަރާކުރެވުނެވެ. ރާއްޖޭގައި ފަސް މިލިއަން ގަސް އިންދުމަށް ސަރުކާރުން ހިންގާ މަޝްރޫޢަށް އެހީތެރިވުމުގެ ގޮތުން ޕާކިސްތާނުން ދޭން ނިންމި އެހީއަށް ރައީސް ޝުކުރު އަދާކުރެއްވިއެވެ. މީގެއިތުރުން ފުލުހުންގެ ޚިދުމަތާއި، ޤާނޫނު ތަންފީޒުކުރުމާއި، ފަންނީ އަދި ވޮކޭޝަނަލް ތަޢުލީމު ކުރިއެރުވުމުގެ އިތުރުން އދ. އަދި އޯއައިސީ (OIC) ފަދަ ބައިނަލްއަޤްވާމީ މައިދާންތަކުގައި އެކުގައި މަސައްކަތްކުރުމާ ގުޅޭގޮތުން ދެ ޤައުމުގެ ވެރިން މަޝްވަރާކުރެއްވިއެވެ.