ސާކް ސަމިޓް ބޭއްވުމުގެ މާހައުލު ގާއިމުކުރުމަށް މެންބަރު ގައުމުތަކާ ގުޅިގެން މަސައްކަތްކުރަން ރާއްޖެ ތައްޔާރު: ރައީސް މުއިއްޒު

އެންމެ އަވަސް ފުރުސަތެއްގައި ދެކުނު އޭޝިއާގެ ސަރަހައްދީ އެއްބާރުލުމުގެ ޖަމްއިއްޔާ (ސާކް) ސަމިޓް ބޭއްވުމަށް ބޭނުންވާ މާހައުލު ގާއިމުކުރުމަށްޓަކައި، ސާކްގެ ހުރިހާ މެންބަރު ގައުމުތަކާ އެކު ގާތުން މަސައްކަތްކުރަން ދިވެހިރާއްޖެ ތައްޔާރަށް އޮތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް މިހެން ވިދާޅުވީ ޕާކިސްތާނުގެ ބޮޑުވަޒީރު ޝެހްބާޒް ޝަރީފްގެ ރަސްމީ ގެކޮޅުގައި، ދެ ގައުމުގެ ދެމެދުގައި މުހިންމު 20 ފަހުމުނާމާއެއްގައި ސޮއިކުރުމަށް ފަހު ދެއްވި ބަޔާނުގައެވެ. ރައީސް ވިދާޅުވީ ގޮންޖެހުންތަކުން އަރައިގަތުމަށް ސަރަހައްދީ ގުޅުން ބަދަހިކުރުމުގައި ސާކްގެ މުހިންމުކަން ރާއްޖެއިން ގަބޫލުކުރާ ކަމަށާއި، ސާކް ހަރަކާތްތެރި ކުރުވުމަށް ރާއްޖެއިން އިސްނަގައިގެން ބިނާކުރަނިވި ދައުރެއް އަދާކުރަން ދެމިއޮންނާނެ ކަމަށެވެ. އަދި ސަރަހައްދީ އެއްބާރުލުމުގެ ފުރިހަމަ ފައިދާ ހޯދުމަށް އިތުބާރު ގާއިމުކުރުމާއި، މާނަހުރި މަޝްވަރާތައް ކުރުމާއި، އެއްބަޔަކު އަނެއް ބަޔަކަށް ދެނެގަތުން ވަރުގަދަކުރަން ޖެހޭ ކަމަށް ވެސް ފާހަގަކުރެއްވިއެވެ.

ފަލަސްތީނުގެ މައްސަލައަށް އަލިއަޅުއްވާލައްވަމުން، 1967 ވަނަ އަހަރުގެ ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސް ވެރިރަށެއްގެ ގޮތުގައި ކަނޑައަޅައިގެން މިނިވަން ދައުލަތެއް ގާއިމުކުރުމަށާއި އަމިއްލަ ނިންމުންތައް ނިންމުމަށް ފަލަސްތީނުގެ ރައްޔިތުންނަށް އޮތް ހައްގަށް ރާއްޖެއިން ސާބިތުކަމާއެކު ތާއީދުކުރާ ކަމަށް ރައީސް ވިދާޅުވިއެވެ. އަދި މެދުއިރުމަތީގެ ހަމަނުޖެހުންތަކުގައި މަޝްވަރާއާއި ސުލްހަ ގާއިމުކުރުމަށާއި އިންސާނީ އެހީ ފޯރުކޮށްދިނުމަށް ޕާކިސްތާނުން ކުރަމުންދާ ޑިޕްލޮމެޓިކް މަސައްކަތްތަކަށް އެމަނިކުފާނު ތައުރީފުކުރެއްވިއެވެ.

ރާއްޖެއާއި ޕާކިސްތާނުގެ 60 އަހަރުވީ ގާތް ގުޅުމުގެ މައްޗަށް ބިނާކޮށް، ދެ ގައުމުގެ ގުޅުން އާ ހަރުފަތަކަށް ގެންގޮސް، ދެ ގައުމުގެ ރައްޔިތުންނަށް ފާގަތިކަމާއި ފުރުސަތުތައް ފަހިކޮށްދޭ އާ ބާބެއް ފެށުމަށް އެއްބަސްވެވުނު ކަމަށް ރައީސް ވިދާޅުވިއެވެ. އަދި ޕާކިސްތާނުން ދެއްވި ހޫނު މަރުހަބާއާއި މެހެމާންދާރީއަށްޓަކައި ބޮޑުވަޒީރު ޝަރީފަށާއި އެ ގައުމުގެ ރައްޔިތުންނަށް އެމަނިކުފާނު ޝުކުރު އަދާކުރެއްވިއެވެ.