ބޮޑުތަކުރުފާނު މަގުގެ ބައެއް ބަންދުކޮށް ތާރުއެޅުމުގެ މަސައްކަތް ކުރިއަށް ގެންދަނީ

މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމަށް ހިންގާ މަޝްރޫއުގެ ދަށުން، އިއްޒުއްދީން ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް އޮންނަ ސަރަހައްދު އާދީއްތަ ދުވަހުން ފެށިގެން ބަންދުކުރުމަށް ނިންމައިފިއެވެ.

ފުލުހުންގެ ރަސްމީ އެކްސް އެކައުންޓުން މައުލޫމާތު ދީފައިވާ ގޮތުގައި، ބޮޑުތަކުރުފާނު މަގުގެ މި ބައި ބަންދުކުރަން ނިންމާފައިވަނީ އާދީއްތަ ދުވަހުގެ ރޭދަމުން 00:00 އިން ފެށިގެންނެވެ. އަދި މި ސަރަހައްދު އާންމު ދަތުރުފަތުރަށް ބަންދުވެފައި އޮންނާނީ މަގުގައި ތާރުއަޅާ ނިމެންދެން ކަމަށްވެސް ފުލުހުން ވިދާޅުވެފައިވެއެވެ. މިކަމާ ގުޅިގެން ދަތުރުފަތުރަށް އަންނާނެ ބަދަލުތައް ދައްކުވައިދޭ ޗާޓެއްވެސް ފުލުހުން ވަނީ އާންމުކޮށްފައެވެ.

މި މަޝްރޫއުގެ މަސައްކަތް ކުރިއަށްގެންދާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނި ގޮތުގައި، ބޮޑުތަކުރުފާނު މަގު ތަރައްގީކުރުމުގެ ފުރަތަމަ ފިޔަވަހީގެ ބޮޑުބައި މިހާރު ވަނީ ނިމުމަކާ ގާތްވެފައެވެ. މިވަގުތު ކުރިއަށްދަނީ މަޝްރޫއުގެ ހަތަރުވަނަ ސެގްމަންޓުގެ މަސައްކަތްތަކެވެ.

އެމްޓީސީސީން ހާމަކޮށްފައިވާ ތަފާސްހިސާބުތަކަށް ބަލާއިރު، އެ ސަރަހައްދުގެ ނަރުދަމާ ނިޒާމު އަޕްގްރޭޑްކޮށް މިހާރު ވަނީ ނިންމާލާފައެވެ. އަދި ދުވާރުގެ މަސައްކަތާއި، ފެން ހޮޅި އެޅުމާއި، މަގުގެ އަރިމަތީ ގާ އެޅުމުގެ އިތުރުން ކޭބަލް ޖަންކްޝަން ފޮށިތައް ހަރުކުރުމުގެ 52 އިންސައްތަ މަސައްކަތް މިހާރު ވަނީ ނިމިފައެވެ. އަންނަ ހަފުތާގެ ތެރޭގައި އެ ސަރަހައްދުގެ ގޭބިސީތަކަށް ފެނާއި ނަރުދަމާގެ އާ ކަނެކްޝަންތައް ދިނުމަށްވެސް ވަނީ ތާވަލުކުރެވިފައެވެ.

ބޮޑުތަކުރުފާނު މަގު ތަރައްގީކުރުމުގެ މި ބިޔަ މަޝްރޫއަކީ މާލޭގެ ތޮއްޖެހިފައިވާ ޓްރެފިކަށް ހައްލެއް ހޯދައިދިނުމަށާއި، ވިއްސާރަ މޫސުމުގައި މަގުތަކުގައި ފެންބޮޑުވާ މައްސަލައަށް ދާއިމީ ހައްލެއް ހޯދައިދިނުމަށް ސަރުކާރުން އިސްކަންދީގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ މުހިންމު މަސައްކަތެކެވެ.