ތުރުކީއާއެކު ވެވުނު އެއްބަސްވުމުގެ ދަށުން ދަނޑުވެރިކަމަށް ބޭނުންވާ ތަކެތި ޑިއުޓީއާ ނުލައި އެތެރެކުރެވޭ ގޮތް ހަމަޖެހިއްޖެ

ދިވެހިރާއްޖެއާއި ތުރުކީވިލާތާ ދެމެދު ގާއިމުކޮށްފައިވާ ހާއްސަ ވިޔަފާރީގެ އެއްބަސްވުމުގެ (ޕްރިފަރެންޝަލް ޓްރޭޑް އެގްރީމެންޓް) ދަށުން، ރާއްޖޭގެ ދަނޑުވެރިކަމުގެ ދާއިރާއަށް ބޮޑެތި ކުރިއެރުންތަކެއް ލިބޭނެ ކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑްގެ ސްޓޭޓް މިނިސްޓަރު ހުސައިން ޒާމިރު ވިދާޅުވެއްޖެއެވެ.

މި އޮގަސްޓް މަހުގެ 1 ވަނަ ދުވަހުން ފެށިގެން އަމަލުކުރަން ފެށި މި އެއްބަސްވުމަކީ ދެ ގައުމުގެ ދެމެދުގައި ކުރެވުނު މަޝްވަރާތަކަށްފަހު، ކަނޑައެޅޭ ވަކި ބާވަތްތަކަކުން އިމްޕޯޓް ޑިއުޓީ ކަނޑާލުމަށް އެކުލަވާލާފައިވާ އެއްބަސްވުމެކެވެ. ބައިނަލްއަގުވާމީ މިންގަނޑުތަކުން ގިންތިކުރެވިފައިވާ 75 ބާވަތެއްގެ މުދަލުން މި އެއްބަސްވުމުގެ ދަށުން ޑިއުޓީއަށް ލުއިތަކެއް ލިބިގެންދާނެއެވެ.

ޕީއެސްއެމް ނިއުސްގެ 'ރާއްޖެ މިއަދު' ޕްރޮގްރާމުގައި ވާހަކަދައްކަވަމުން ސްޓޭޓް މިނިސްޓަރު ޒާމިރު ފާހަގަކުރެއްވި ގޮތުގައި، މި އެއްބަސްވުމުގެ ސަބަބުން ދަނޑުވެރިކަމުގެ ދާއިރާއަށް ވަގުތުން ފައިދާ ކުރަން ފަށާނެއެވެ. ވަކިން ހާއްސަކޮށް، ދަނޑުވެރިކަން ކުރުމަށް ބޭނުންވާ ޒަމާނީ ވަސީލަތްތަކާއި އާލާތްތައް ތުރުކީވިލާތުން އެތެރެކުރާއިރު އެއްވެސް ޑިއުޓީއެއް ދައްކަން ނުޖެހޭނެ ކަމަށް އޭނާ ވިދާޅުވިއެވެ. ތުރުކީއަކީ ދަނޑުވެރިކަމުގެ ދާއިރާގައި ޒަމާނީ ޓެކްނޮލޮޖީ ބޭނުންކުރާ ގައުމަކަށް ވުމާއެކު، މިއީ ރާއްޖޭގެ ދަނޑުވެރިކަން ސިންދަފާތު ކުރަން ބޭނުންވާ ފަރާތްތަކަށް ލިބިގެންދާނެ ރަނގަޅު ފުރުސަތެކެވެ.

"ދަނޑުވެރިކަން ފުޅާކުރަން ބޭނުންވާ ފަރާތްތަކަށް ހައިޑްރޯޕޯނިކްސް ސިސްޓަމްތަކާއި، ވަާޓިކަލް ފާމިންއަށް ބޭނުންވާ އެކި ސާމާނާއި، ގްރީންހައުސް ހަދަން ބޭނުންވާ ތަކެއްޗާއި، އަދި ދަނޑުވެރިކަމާ ގުޅުންހުރި ބޭހާއި ކެމިކަލް ފަދަ ތަކެތި މިހާރު ތުރުކީން އެތެރެކުރާއިރު އެއްވެސް ޑިއުޓީއެއް ދައްކާކަށް ނުޖެހޭނެ،" ޒާމިރު ތަފްސީލުކޮށްދެއްވިއެވެ.

ދަނޑުވެރިކަމުގެ އިތުރުން، މި އެއްބަސްވުމުގެ ސަބަބުން ރާއްޖޭގެ ޖުމްލަ އިމްޕޯޓް ދާއިރާއަށް ވެސް ބޮޑު ކުރިއެރުމެއް އަންނާނެ ކަމަށް ލަފާކުރެވެއެވެ. މިހާރުވެސް ދެ ގައުމުގެ ދެމެދުގައި އަހަރަކު ގާތްގަނޑަކަށް 70 މިލިއަން ޑޮލަރުގެ ވިޔަފާރި ކުރެވެއެވެ. މި އެއްބަސްވުމުގެ ދަށުން ތުރުކީން ރާއްޖެއަށް އެތެރެކުރާ 404 ބާވަތެއްގެ މުދަލުން ޑިއުޓީ ކުޑަކުރެވިގެންދާއިރު، އޭގެ ތެރެއިން ގާތްގަނޑަކަށް ދެބައިކުޅަ އެއްބައި މުދަލުން ވަނީ މުޅިން ޑިއުޓީ ކަނޑާލާފައެވެ. މީގެ ސަބަބުން ފެންވަރު ރަނގަޅު މުދާ ހެޔޮ އަގުގައި ދިވެހި ރައްޔިތުންނަށް ލިބިގެންދާނެއެވެ.