ނޭޝަނަލް ޕްރިވެންޓިވް މެކޭނިޒަމްއިން ކުރާ ޒިޔާރަތްތަކުގައި ތަޙުޤީޤެއް ނުކުރާނެ

ނޭޝަނަލް ޕްރިވެންޓިވް މެކޭނިޒަމްއިން ކުރާ ޒިޔާރަތްތަކުގައި ތަޙުޤީޤެއް ނުކުރާނެ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ބުނެފިއެވެ.

އެ މަރުކަޒުގެ އެންމެހާ ކަންތައްތައް އޮބްޒާބްކުރުމުގެ އިތުރަށް އެ މަރުކަޒުގެ ލިޔެކިޔުންތައް ބަލައި ބަންދުގައި ތިބޭ މީހުންނާއި މުވައްޒަފުންނާއި އިންޓަވިއުކޮށް ލިބޭ މަޢުލޫމާތު ޓްރޭންގިއުލޭޓްކުރާނެ ކަމަށް ވެސް އެ ކޮމިޝަނުން ބުންޏެވެ.

ދިވެހިރާއްޖެއިން 2004 އޭޕްރީލް 20 ގައި ތަޞްދީޤްކޮށްފައިވާ ޓޯޗަރ މަނާކުރުމާބެހޭ ބައިނަލްއަޤްވާމީ މުޢާހަދާ އަދި 2006 ފެބްރުވަރީ 15 ގައި ތަސްދީޤްކޮށްފައިވާ އެ މުޢާހަދާގެ އިޚްތިޔާރީ މުޢާހަދާގެ ދަށުން ކޮންމެ ދައުލަތަކުން ވެސް ނޭޝަނަލް ޕްރިވެންޓިވް މެކޭނިޒަމް އެއް ޤާއިމުކުރުމަށް ލާޒިމްކުރެއެވެ. މިގޮތުން ދިވެހި ދައުލަތުން ހިޔުމަން ރައިޓްސް ކޮމިޝަން އޮފް ދަ މޯލްޑިވްސް 2007 ޑިސެންބަރު މަހުގެ 10 ވަނަ ދުވަހު ރައީސުލްޖުމްހޫރިއްޔާގެ ޤަރާރަކުން ދިވެހިރާއްޖޭގެ ނޭޝަނަލް ޕްރިވެންޓިވް މެކޭނިޒަމްގެ ގޮތުގައި ކަނޑައަޅާފައިވެއެވެ.

ނޭޝަނަލް ޕްރިވެންޓިވް މެކޭނިޒަމްގެ ފަރާތުން ދައުލަތުގެ ބާރު ހިނގާ ސަރަހައްދުގައި މިނިވަންކަން ގެއްލޭގޮތަށް މީހުންނާއި ކުދިން ބަހައްޓާ ހުރިހާ ތަނަކަށް ޒިޔާރަތްކުރުމުގެ ބާރު ޤާނޫނު ނަންބަރު 2013/13 އިން ކޮމިޝަނަށް ލިބިފައިވެއެވެ. މީގެއިތުރުން އެއްވެސް ހުރަހެއްނެތި ކުރިން އެންގުމަކާ ނުލައި މިފަދަ ތަންތަނަށް ޒިޔާރަތްކުރުމުގެ އިޚްތިޔާރާއި ބާރުވެސް ލިބިގެންވެއެވެ.

ނޭޝަނަލް ޕްރިވެންޓިވް މެކޭނިޒަމްގެ މައިގަނޑު 4 މަސްޢޫލިއްޔަތެއް ހިމެނެއެވެ. އޭގެތެރެއިން އެންމެ މުޙިއްމު މަސްޢޫލިއްޔަތަކީ މިނިވަންކަން ގެއްލޭގޮތަށް ދައުލަތުގެ ބެލުމުގެދަށުގައި މީހުން ނުވަތަ ކުދިން ބަންދުކުރާ ތަންތަނަށް ޒިޔާރަތްކޮށް އެތަންތަނުގައި ތިބޭ ފަރާތްތަކާމެދު ޢަމަލުކުރަމުންދާގޮތް ދެނެގަތުމެވެ. އަދި ޓޯޗަރއާއި ރަޙުކުމްކުޑަ ލާއިންސާނީ އިހާނެތި އަދި އިންސާނީ ކަރާމާތް ގެއްލޭފަދަ އަދަބުދިނުމާއި ދަށުދަރަޖައިގެ ޢަމަލެއް ހިނގާތޯ ދެނެގަތުމެވެ.

ފާހަގަކުރުންތަކަށް ރިއާޔަތްކޮށް ރިޕޯޓެއް ތައްޔާރުކޮށް ގުޅުންހުރި އިދާރާތަކާއި ހިއްސާކުރާނެ ކަމަށް ވެސް ބުންޏެވެ. މީގެ އިތުރުން ލަފާ ދިނުމުގެ މަސްޢޫލިއްޔަތުގެ ތެރޭގައި މަރުކަޒުތަކުން ފޯރުކޮށްދޭ ފަރުވާ ރަނގަޅުކުރުމަށް ކަމާބެހޭ ފަރާތްތަކަށް ހުށަހެޅުންތައް ހުށަހަޅައި ލަފާ ދީ ބިނާކުރަނިވި ބައްދަލުވުންތައް ބޭއްވުން ހިމެނެއެވެ.

މިހާރު ހުރި ނުވަތަ ޑްރާފްޓްކުރާ ޤާނޫނުތަކާއި ޤަވާއިދުތައް އަދި އިންސާނީ ހައްގުތަކާބެހޭ އެކްޝަން ޕްލޭންތަކަށް ގެންނަން ފެންނަ ބަދަލުތަކާ ގުޅޭގޮތުން ސަރުކާރާއި މަޖިލީހާއި ކަމާބެހޭ އެހެން ފަރާތަކަށް ޚިޔާލުތަކާއި ލަފާތަކާއި ހުށަހެޅުންތަކާއި ރިޕޯޓްތައް ހުށަހެޅުން ވެސް ހިމެނެއެވެ.

ތަޢުލީމު ދީ ހޭލުންތެރުކުރުވުމުގެ މަސްޢޫލިއްޔަތުތަކުގެ ތެރޭގައި ސްކޫލުތަކާއި ޔުނިވަރސިޓީތަކާއި ދައުލަތުގެ ކަމާގުޅުންހުރި އިދާރާތަކަށް އަމާޒުކޮށްގެން ތަމްރީނު އަދި ހޭލުންތެރިކުރުމުގެ ޕްރޮގްރާމްތައް ހިންގުން ހިމެނެއެވެ. އަދި ޤާނޫނު ތަންފީޒުކުރާ ފަރާތްތަކާއި އެހެނިހެން މުވައްޒަފުންގެ ތެރެއިން ބަންދުކޮށްފައި ހުންނަ ފަރާތްތަކާ އެއްވެސް ގޮތަކަށް މުއާމަލާތްކުރަންޖެހޭ ފަރާތްތަކަށް ދެވޭ ތަމްރީނުތަކުގައި ޓޯޗަރކުރުން މަނާކުރުމާގުޅޭ މައުލޫމާތު ހިމެނިފައިވޭތޯ ބެލުން ވެސް ހިމެނެއެވެ.

ނޭޝަނަލް ޕްރިވެންޓިވް މެކޭނިޒަމްގެ މަޤުޞަދުތައް ހާސިލުކުރުމަށްޓަކައި ދައުލަތުގެ އިދާރާތަކާއި ބައިނަލްއަޤުވާމީ ފަރާތްތަކާ ގުޅިގެން މަސައްކަތްކުރުންވެސް ހިމެނެއެވެ. އެގޮތުން ބައިނަލްއަގުވާމީ މުއާހަދާތަކުގެ ދަށުން ހުށަހަޅަންޖެހޭ ރިޕޯޓުތައް ތައްޔާރުކުރުމުގައި އެހީތެރިވެ އަމިއްލަ ރިޕޯޓުތައް ހުށަހެޅުމާއި ހިޔާލު ފާޅުކުރުން ވެސް ހިމެނެއެވެ.

Clear

CopySelect category