ދިވެހި ޙައްޖުވެރިން އެނބުރި ރާއްޖެ އައުމަށް ހަމަޖެހިފައިވާ ތާރީޚުތަކާއި ގަޑިތައް ހާމަކޮށްފި

މިއަހަރުގެ ބަރަކާތްތެރި ޙައްޖުގެ އަޅުކަން ފުރިހަމަކުރުމަށްފަހު ދިވެހި ޙައްޖުވެރިން އެނބުރި ރާއްޖެ އައުމަށް ހަމަޖެހިފައިވާ ތާރީޚުތަކާއި ފްލައިޓްތަކުގެ ތަފްޞީލް މޯލްޑިވްސް ޙައްޖު މިޝަނުން މިހާރު ވަނީ އިޢުލާނުކޮށްފައެވެ.

އެކްސްގައި ކުރި ޕޯސްޓެއްގައިވާ ގޮތުން، ޙައްޖުވެރިން އެނބުރި ރާއްޖެ އައުމަށް ހަމަޖެހިފައިވަނީ ޖުމްލަ ހަތަރު ފްލައިޓެއްގައެވެ. މި ހުރިހާ ފްލައިޓްތަކެއްވެސް ފުރުމަށް ހަމަޖެހިފައިވަނީ ސައުދީ އަރަބިއްޔާގެ މަދީނާއިން ކަމަށް އެ މިޝަނުން މަޢުލޫމާތު ދެއެވެ.

މިގޮތުން ޙައްޖުވެރިން ރާއްޖެ އައުމަށް ހަމަޖެހިފައިވާ ފުރަތަމަ ފްލައިޓަކީ 2026 ޖޫން 5 ވާ ދުވަހު ސައުދީ އަރަބިއަން އެއާލައިންސް އިން ދަތުރުކުރާ ފްލައިޓެކެވެ. މި ފްލައިޓް މަދީނާއިން ފުރުމަށް ހަމަޖެހިފައިވަނީ އެދުވަހުގެ ފަތިހު 03:15 ގައި ކަމަށްވާއިރު، ރާއްޖެއަށް އާދެވޭނެ ކަމަށް ލަފާކުރެވެނީ މެންދުރުފަހު 14:00 ގައެވެ. އަދި ދެވަނަ ފްލައިޓް ޖޫން މަހުގެ 7 ވަނަ ދުވަހު މޯލްޑިވިއަން އެއާލައިންގައި ދަތުރުކުރުމަށް ހަމަޖެހިފައިވާއިރު، އެ ފްލައިޓް މަދީނާއިން ފުރާނީ ހެނދުނު 09:40 ގައެވެ. މި ފްލައިޓް ރާއްޖެއަށް ލަފާކުރާ ގަޑިއަކީ އެދުވަހުގެ ހަވީރު 17:40 އެވެ.

ޙައްޖުވެރިން އެނބުރި އައުމަށް ހަމަޖެހިފައިވާ ތިންވަނަ ފްލައިޓް ދަތުރުކުރުމަށް ހަމަޖެހިފައިވަނީ ޖޫން މަހުގެ 8 ވަނަ ދުވަހު ސައުދީ އަރަބިއަން އެއާލައިންސްގައެވެ. މި ފްލައިޓްވެސް މަދީނާއިން ފަތިހު 03:15 ގައި ފުރައިގެން ރާއްޖެއަށް އާދެވޭނެ ކަމަށް ބެލެވެނީ މެންދުރުފަހު 14:00 ގައެވެ. އެންމެ ފަހު ފްލައިޓް ނުވަތަ ހަތަރުވަނަ ފްލައިޓް ޖޫން މަހުގެ 9 ވަނަ ދުވަހު މޯލްޑިވިއަންގައި ދަތުރުކުރުމަށް ވަނީ ހަމަޖެހިފައެވެ. މި ފްލައިޓް މަދީނާއިން ފުރާނީ އެދުވަހުގެ ހަވީރު 16:00 ގައި ކަމަށްވާއިރު، ރާއްޖެއަށް އާދެވޭނީ ޖެހިގެން އަންނަ ދުވަހުގެ ދަމުން ބައިގަޑި އެއްހާއިރު ނުވަތަ 00:01 ގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޙައްޖުވެރިންގެ ކަންކަމަށް ޚާއްޞަ އިސްކަމެއް ދެއްވައިގެން ކުރިއަށް ގެންދާއިރު، ޙައްޖުވެރިން އެނބުރި ރާއްޖެ އައުމުގެ އިންތިޒާމްތައް މޯލްޑިވްސް ޙައްޖު ކޯޕަރޭޝަނާއި ޙައްޖު މިޝަނުން ދަނީ ވަރަށް ގާތުން ބަލަމުންނެވެ. ޙައްޖުވެރިން އެނބުރި އައުމުން އެ ފަރާތްތަކަށް މަރުޙަބާ ކިޔުމުގެ އިންތިޒާމްތައް ވެލާނާ އިންޓަރނޭޝަނަލް އެއާޕޯޓުގައި މިހާރު ދަނީ ރޭވެމުންނެވެ.