މިއަހަރުގެ އަޟްޙާ ޢީދުގެ މުނާސަބަތުގައި ރައީސްގެ ދެކަނބަލުން ދިވެހި ރައްޔިތުންނަށް ތަހުނިޔާ ފޮނުއްވައިފި
މިއަހަރުގެ ބަރަކާތްތެރި އަޟްޙާ ޢީދުގެ އުފާވެރި މުނާސަބަތާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު، ދިވެހި އެންމެހާ ރައްޔިތުންނަށް ޢީދުގެ ތަހުނިޔާ އާއި ހެޔޮއެދުންތައް އަރިސްކުރައްވައިފިއެވެ.
ރައީސުލްޖުމްހޫރިއްޔާ ޑރ. މުޢިއްޒު މިއަދު އެކްސް މެދުވެރިކުރައްވައި ކުރެއްވި ޕޯސްޓެއްގައި، މާތް ﷲގެ ޙަޟްރަތަށް ޙަމްދުކުރައްވައި، ތަކުބީރުގެ މަތިވެރި އަޑުތަކާއެކު އިސްލާމީ ރޫޙާ އެއްގޮތްވާ ގޮތުގެ މަތިން ޢީދުގެ އުފާ ފާޅުކުރުމަށް ހުރިހާ ރައްޔިތުންނަށް އިލްތިމާސްކުރެއްވިއެވެ.
އެމަނިކުފާނުގެ މެސެޖުގައި ބޮޑު ޢީދުގެ ދުވަސްވަރަކީ ޢާއިލާތަކާއެކު ރަށްރަށަށް ދަތުރުކޮށް، އިޖްތިމާޢީ ގުޅުންތައް ބަދަހިކުރުމުގެ ރީތި އާދަ ދިވެހިންގެ ތެރޭގައި އޮންނަކަން ފާހަގަކުރެއްވިއެވެ. އަދި މި އަހަރުގެ ޢީދަކީ މުޖުތަމަޢުގެ ބަދަހިކަމާއި އުޚުއްވަތްތެރިކަން އިތުރުވެ، ކޮންމެ ރައްޔިތަކަށްމެ އަމާންކަމާއި ހިތްހަމަޖެހުން ލިބިގެންދާނެ ޢީދަކަށް ވުމަށް އެދިވަޑައިގެން ހެޔޮ ދުއާ ކުރެއްވިއެވެ.
ރައީސްގެ އަނބިކަނބަލުން ސާޖިދާ މުޙައްމަދު ވެސް ވަނީ އެކްސް މެދުވެރިކުރައްވައި ދިވެހި އެންމެހާ އަޚުންނާއި އުޚުތުންނަށް އަޟްޙާ ޢީދުގެ މުބާރަކުބާދީ ފޮނުއްވާފައެވެ. އެކަމަނާގެ މެސެޖުގައި، މި ބަރަކާތްތެރި ދުވަހަކީ އެކަކު އަނެކަކަށް އޮންނަ ލޯބިވެތިކަމާއި ކުލުނުން ފުރިގެންވާ ދުވަހެއް ކަމުގައި ލެއްވުމަށް އެދި ދުއާ ކުރެއްވިއެވެ.
ރާއްޖޭގެ ހުރިހާ ކަންކޮޅުތަކެއްގައި މިއަދު ޢީދުގެ ފޯރި ގަދަވެފައިވާއިރު، ރައީސްގެ ދެކަނބަލުން ވަނީ މި އުފާވެރި މުނާސަބަތުގައި ރައްޔިތުންނާ ގާތުން ބައިވެރިވެވަޑައިގަންނަވާނެ ކަމުގެ ޔަގީންކަން ދެއްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
