އިންޑިއާގެ މަޝްހޫރު 'ގުލްބަރުގާ ތޫރް ދާލް' ރާއްޖެއަށް އެކްސްޕޯޓްކުރަން ފަށައިފި

އިންޑިއާގެ ދަނޑުވެރިކަމުގެ އުފެއްދުންތަކަށް ބައިނަލްއަޤްވާމީ މާކެޓް ފުޅާކުރުމުގެ ގޮތުން، ޚާއްޞަ ސިފަތަކެއް ލިބިގެންވާ "ޖިއޮގްރަފިކަލް އިންޑިކޭޝަން" (ޖީއައި) ޓެގް ލިބިފައިވާ "ގުލްބަރުގާ ތޫރް ދާލް" (މުގު) ގެ އެއް މެޓްރިކް ޓަނުގެ ޝިޕްމަންޓެއް ރާއްޖެއަށް އެކްސްޕޯޓްކޮށްފިއެވެ.

އިންޑިއާގެ ކަރްނާޓަކާ ސްޓޭޓުން ރާއްޖެއަށް މި ތަކެތި ފޮނުވާފައިވަނީ ސެޕްޓެމްބަރު 24 ގައެވެ. މި މަސައްކަތް ކުރިއަށް ގެންގޮސްފައިވަނީ އިންޑިއާގެ އެގްރިކަލްޗަރަލް އެންޑް ޕްރޮސެސްޑް ފުޑް ޕްރޮޑަކްޓްސް އެކްސްޕޯޓް ޑިވެލޮޕްމަންޓް އޮތޯރިޓީ (އަޕެޑާ) ގެ އެހީތެރިކަމާއެކު، މައިސޫރުގެ ކުންފުންޏެއް ކަމަށްވާ ސިލްކެން ގްލޯބަލް އެކްސްޕޯޓްސް އެންޑް އިމްޕޯޓްސް މެދުވެރިކޮށެވެ. ދަނޑުވެރިންގެ ޖަމްޢިއްޔާއެއް (އެފްޕީއޯ) ގެ ބްރޭންޑެއްގެ ދަށުން ބަންދުކުރެވިފައިވާ މި މުގު ރާއްޖެއަށް ގެންނަނީ ކަނޑުމަގުންނެވެ.

އިންޑިއާގެ މިނިސްޓްރީ އޮފް ކޮމާސް އެންޑް އިންޑަސްޓްރީން ހާމަކޮށްފައިވާ ގޮތުގައި، މި އެކްސްޕޯޓް ޗެނަލްގެ ސަބަބުން ދަނޑުވެރިންނަށް އެކަށީގެންވާ ރަނގަޅު އަގެއް ލިބިގެންދާނެއެވެ. އެގޮތުން ޢާންމު ބާޒާރުގައި ކިލޯއެއް ގާތްގަނޑަކަށް 60 ރުޕީސްއަށް ވިކޭއިރު، ރާއްޖެއަށް އެކްސްޕޯޓްކުރުމުން ކިލޯއަކަށް 82 ރުޕީސް ލިބޭނެ ކަމަށް ލަފާކުރެވެއެވެ. މިއީ ޢާންމު އަގަށްވުރެ 30 އިންސައްތައަށްވުރެ ބޮޑު ކުރިއެރުމެކެވެ.

މި އިސްނެގުމުގެ މައިގަނޑު މަޤްޞަދަކީ ދަނޑުވެރިންގެ އުފެއްދުންތެރި ޖަމާޢަތްތަކަށް ބައިނަލްއަޤްވާމީ ވިޔަފާރީގެ ފުރުޞަތުތައް ފަހިކޮށްދިނުމެވެ. އިންޑިއާގެ އޮފިޝަލުން ވިދާޅުވާ ގޮތުގައި، މި ފެށުނު ޝިޕްމަންޓާއެކު ކުރިއަށް އޮތް ތަނުގައި މެދުކެނޑުމެއްނެތި ރާއްޖެއަށް ގުލްބަރުގާ ތޫރް ދާލް އެކްސްޕޯޓް ކުރުމުގެ މަގު ފަހިވެ، ކަރްނާޓަކާގެ ދަނޑުވެރިންނަށް ދެމެހެއްޓެނިވި މާކެޓެއް ލިބިގެންދާނެއެވެ.

ކަރްނާޓަކާގެ ކަލަބުރަގީ ސަރަޙައްދަށް ޚާއްޞަ މި މުގަށް 2019 ވަނަ އަހަރު ވަނީ ޖީއައި ރަޖިސްޓްރޭޝަން ލިބިފައެވެ. މިއީ އޭގެ ރަހައާއި ފެންވަރުގެ ގޮތުން ފާހަގަކޮށްލެވޭ، އެ ސަރަޙައްދުގެ ދަނޑުވެރިކަމުގެ މުހިންމު އުފެއްދުމެކެވެ.

އަޕެޑާގެ ޗެއާމަން އަބިޝެކް ދޭވް ވިދާޅުވީ، ރާއްޖެއަށް މި މުގު އެކްސްޕޯޓް ކުރަން ފެށުމަކީ ގުލްބަރުގާ ތޫރް ދާލްގެ ބައިނަލްއަޤްވާމީ ނަން ދެމެހެއްޓުމަށާއި، ބައިނަލްއަޤްވާމީ ބާޒާރުގައި ޖީއައި ޓެގް ލިބިފައިވާ ޚާއްޞަ އުފެއްދުންތައް އިޝްތިހާރުކުރުމަށް ލިބުނު ވަރަށް ރަނގަޅު ފުރުޞަތެއް ކަމަށެވެ.