އޭސީސީއަށް ހުށަހަޅާ މައްސަތަކުގެ އަދާހަމަ ލިބުން ޑިޖިޓަލައިޒްކޮށް އޮޓޮމޭޓްކޮށްފި

އެންޓި-ކޮރަޕްޝަން ކޮމިޝަނަށް ހުށަހެޅޭ މައްސަލަތަކުގެ އަދާހަމަ ކާކުކަން އެނގޭގޮތަށް އެ މައްސަލަ ހުށަހަޅާ ފަރާތްތަކަށް އޮޓޯމޭޓްޑް ނިޒާމެއްގެ ތެރެއިން ލިބޭނެ އިންތިޒާމް އެންޓި-ކޮރަޕްޝަން ކޮމިޝަނުން ހަމަޖައްސައިފިއެވެ.

 ލިބީގެ ނަމުގައި މިއަދު ތަޢާރަފުކުރެވުނު މި ނިޒާމުގެތެރެއިން، މައްސަލަ ހުށަހަޅާ ހިސާބުން ފެށިގެން މައްސަލަ ނިމެންދެން މައްސަލައާ ގުޅިގެން ކޮމިޝަނުން ކުރިޔަށް ގެންދާ ކޮންމެ މަރުޙަލާއެއް ފެށުމުން އަދި ނިމުމުން އެކަމުގެ އަދާހަމަ، ކާކުކަން އެނގޭގޮތަށް ފޯނު ނަމަބަރާއިއެކު މައްސަލަ ހުށަހަޅާ ފަރާތަކަށް، އެސް އެމް އެސްގެ ޒަރީޢާއިން ލިބެމުން ދާނެއެވެ.

މިއަދު ތަޢާރަފުކުރި ލިބީގެ ފަންކަޝަންގެ ސަބަބުން، ކޮމިޝަނަށް ޙާޟިރުނުވެ، މައްސަލައިގެ އަދާހަމަ ބެލުމަށް އިތުރު ވަގުތު ހޭދަ ކުރުމަކާނުލައި މައްސަލައިގެ އަދާހަމަ ލިބިގެންދާނެއެވެ. އަދި މި ފަންކްޝަންގެ ސަބަބުން، މައްސަލަތަކުގެ އަދާހަމަ ހޯދުމަށް އެދި ހުށަހަޅާ ހުށަހެޅުންތަކަށް ޖަވާބުދިނުމަށް ހޭދަކުރަމުންދާ ވަގުތު ސަލާމަތްކުރެވި، ހުށައަޅާ މައްސަލައާއި ގުޅިގެން ކޮމިޝަނުން ނިންމާ ނިންމުން ފަސޭހައިން އެނގިގެންދާނެއެވެ.

ލިބީގެ އިފްތިތާޙު ކޮށްދެއްވީ 2024 ޖުލައި 29 ގައި މިކަމަށްޓަކައި އެންޓި-ކޮރަޕްޝަން ކޮމިޝަނުގައި ބޭއްވި ޚާއްސަ ރަސްމިއްޔާތެއްގައި ކޮމިޝަނުގެ ރައީސް އަލްއުސްތާޛް އާދަމް ޝާމިލްއެވެ.