ދަނޑުވެރިންގެ ދަނޑުތަކަށް ސޯލާ ހަކަތައިން ކަރަންޓު ފޯރުކޮށްދިނުމަށް މަޝްވަރާ ކުރައްވައިފި
ދަނޑުވެރިންގެ ދަނޑުތަކަށް ސޯލާ ހަކަތަ މެދުވެރިކޮށް ކަރަންޓު ފޯރުކޮށްދިނުމާ ގުޅޭގޮތުން ދަނޑުވެރިކަމާ ދިރޭތަކެއްޗާ ބެހޭ ވުޒާރައިގެ ވަޒީރު ޑރ.އައިޝަތު ރަމީލާ އާއި މޫސުމީބަދަލުތަކާ ތިމާވެއްޓާ ހަކަތައާއި ބެހޭ ވުޒާރައިގެ ވަޒީރު ތާރިޤް އިބްރާހީމް މަޝްވަރާކުރައްވައިފިއެވެ. މި މަޝްވަރާގައި ދެ މިނިސްޓަރީގެ އިސްވެރިން ބައިވެރިވެ ވަޑައިގެންނެވިއެވެ.
މި މަޝްވަރާގައި މައިގަނޑު ގޮތެއްގައި ވާހަކަފުޅު ދައްކަވާފައިވަނީ ދަނޑުވެރިންގެ ދަނޑުތަކަށް ސޯލާ ހަކަތަ މެދުވެރިކޮށް ކަރަންޓު ފޯރުކޮށްދިނުމުގެ މަޝްރޫޢުއާ ގުޅޭގޮތުންނެވެ.
މި މަޝްރޫޢުގެ ސަބަބުން ދަނޑުވެރިންނަށް ލިބިގެންދާނެ ފައިދާތަކާއި، މި މަޝްރޫޢު ކުރިއަށް ގެންދިއުމުގައި ދިމާވެދާނެ ގޮންޖެހުންތަކާ ބެހޭގޮތުން ދެ ވަޒީރުން މަޝްވަރާކުރެއްވެވިއެވެ. އަދި މި މަޝްރޫޢު ތަންފީޒުކުރުމަށް ދެ ވުޒާރާއިން ކުރެވިދާނެ މަސައްކަތްތަކާ ބެހޭގޮތުންވެސް ވާހަކަދެއްކެވިއެވެ.
ސަރުކާރުން ސޯލާ ހަކަތައަށް ދެއްވާ އަހައްމިއްޔަތުކަން މި މަޝްވަރާއިން ހާމަވެގެންދާއިރު، ތިމާވެށްޓާ ރައްޓެހި ހަކަތަ ބޭނުންކޮށްގެން ދަނޑުވެރިކަމުގެ ދާއިރާ ކުރިއެރުވުމަށް ސަރުކާރުން މަސައްކަތްކުރައްވާކަން ފާހަގަކުރެވުނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
