ކުރިމަތި ފަރާތުގައި މަސްތުވާތަކެތި ފޮރުވައިގެން އެތެރެކުރަން އުޅުނު މީހަކު ހައްޔަރުކޮށްފި

މަސްތުވާތަކެތި ރާއްޖެއަށް އެތެރެކޮށް އެތަކެތީގެ ވިޔަފާރިކުރާ ކަމުގެ ތުހުމަތުގައި ހައްޔަރުކުރި އުމުރުން 32 އަހަރުގެ އަންހެނަކު 30 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.

މި މައްސަލާގައި ހައްޔަރުކޮށްފައިވަނީ މއ. މޯނިންގވިއު، އާމިނަތު ޝަފަގްއެވެ.

ފުލުހުން އޭނާ ހައްޔަރުކޮށްފައިވަނީ ރާއްޖެއަށް މަސްތުވާތަކެތި އެތެރެކޮށް އެތަކެތި ޓްރެފިކް ކުރާކަމުގެ ތުހުމަތުގައެވެ. މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ކޯޓުން ވަނީ އޭނާ 30 ދުވަހުގެ މުއްދަތަށް ކަސްޓޯޑިއަލް ޖަލެއްގައި ބަންދުކުރުމަށް އަމުރުކޮށްފައެވެ.

ޝަފަގްގެ މައްޗަށް ތުހުމަތުކުރެވޭ މިންވަރަށް ފުލުހުން ވަނީ ކޯޓަށް ހެކި ހުށަހަޅާފައެވެ. އެގޮތުން މީނާ އެކްސްރޭކޮށް ބެލިބެލުމުން މީނާގެ ކުރިމަތި ފަރާތުގައި އެއްޗެއް ފޮރުވާފައިހުރިކަމަށް ދައްކާފައިވެއެވެ. އަދި މީނާ އާއި ސުވާލުކުރުމުން އެއީ ކޮކޭން ކަމަށް ބުނެފައިވެއެވެ. ކޮންޓްރޯލް ޑެލިވަރީ އޮޕަރޭޝަން ހިންގާ ތަކެތި ރައްދުވާން ޖެހޭ ފަރާތާއިއެކު މުއާމަލާތްކޮށްފައިވެއެވެ. އަދި މީނާ ލައިގެންހުރި ޖީންސާއި ހަށިގަނޑާއި ދޭތެރެއިން ދެޕެޑް ނަގާ ދިނުމުން ބަލާފާސްކުރިކުރުމުން މިދެޕެޑް ދޭތެރޭގައި ފޮރުވާފައި އިން ޕްލާސްޓިކް ކޮތަޅެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި 30 ރަބަރު ކޮތަޅު ފެނިފައިވެއެވެ. ފެނިފައިވާ ތަކެތީގެ ވަގުތީ ބަރުދަނުގައި 31 ގްރާމް ހުއްޓެވެ.

ޝަފަގް ބަންދުގައި ބެހެއްޓުމަށް ކޯޓުން ނިންމީ އޭނާ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށް ފެންނާތީއެވެ. މިއީ ޖިނާއީ އިޖުރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާއަށް ރިއާޔަތްކޮށް ނިންމާފައިވާ ނިންމުމެކެވެ. އަދި ޝަރީއަތް ކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގައި ބަޔާންކުރާ ހާލަތްތައް މި މައްސަލާގައި ފުރިހަމަވާ ކަމަށްވެސް ކޯޓުން ކަނޑައަޅާފައިވެއެވެ.

މި މައްސަލައިގެ ބަންދު އަމުރުގައި އިތުރަށް ފާހަގަކޮށްފައިވާ ގޮތުގައި، ޝަފަގް އަކީ ނަފްސާނީ ބައްޔަކަށް ފަރުވާ ހޯދަމުންދާ މީހެކެވެ. އެހެންކަމުން އޭނާ ބަންދުގައި ހުންނަ މުއްދަތުގައި އެކަށީގެންވާ ނަފްސާނީ ފަރުވާ ލިބޭނެ އިންތިޒާމު ހަމަޖައްސައިދިނުމަށާއި، ކްލޯޒް މޮނިޓަރިންގ ކުރިއަށް ގެންދިއުމަށް ކޯޓުން ވަނީ ކަމާބެހޭ އިދާރާތަކަށް އަންގާފައެވެ.