ރަސްމާލޭގެ ބިމަކީ ދައުލަތުގެ މިލްކެއް، ޕްރޮޕަޓީ އޮޓޮމެޓިކުން ވާރުތައެއް ނުވާނެ: މިނިސްޓަރު މުއްޠަލިބް

ރަސްމާލެ މަޝްރޫޢުގެ ދަށުން ޕްރޮޕަޓީ ގަންނަ ފަރާތްތަކަށް މިލްކުވާނީ ހަމައެކަނި އެ ޕްރޮޕަޓީ ކަމަށާއި، އެ ޕްރޮޕަޓީ ހިމެނޭ ބިމަކީ ދިވެހި ދައުލަތުގެ މިލްކެއް ކަމަށް މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

މިނިސްޓަރު މުއްޠަލިބް މިކަން ހާމަކުރެއްވީ ރަސްމާލެ މަޝްރޫޢާ ގުޅޭގޮތުން ދެކެވޭ ބައެއް ވާހަކަތަކުގެ ޙަޤީޤަތް ހާމަކުރައްވަމުންނެވެ. މިނިސްޓަރު ވިދާޅުވީ، ރަސްމާލޭން ގަންނަ ޕްރޮޕަޓީއެއް ވިއްކާލަން ބޭނުންވި ނަމަވެސް ނުވަތަ އެ ފަރާތެއް މަރުވުމުން ވާރުތަވާން އޮތް ނަމަވެސް، އެކަން ކުރެވޭނީ ދިވެހި ސަރުކާރުން ބަލަންޖެހޭ ކަންކަން ބެލުމަށްފަހު ހުއްދަ ދީގެން ކަމަށެވެ. އަދި ސަރުކާރުން އެފަދަ ހުއްދައެއް ދޭނީވެސް އެކަމަށް ކަނޑައެޅިފައިވާ ފީ ނެގުމަށްފަހު ކަމަށްވާތީ، އޮޓޮމެޓިކުން އެ ތަންތަން ވާރުތަވާނެ ކަމަށް ބުނުމަކީ ޙަޤީޤަތާ ޚިލާފު ވާހަކައެއް ކަމަށް މިނިސްޓަރު ފާހަގަކުރެއްވިއެވެ. މިސާލެއްގެ ގޮތުން މިނިސްޓަރު ވިދާޅުވީ، ރާއްޖޭގައި މިހާރުވެސް ހުރި ބޭރު ފަރާތްތަކުގެ ރިސޯޓުތަކާއި ވިޔަފާރިތަކަކީވެސް އުސޫލުތަކުގެ ތެރެއިން ވިއްކައި، ބަދަލުކޮށް، އަދި ވާރުތަވާ މުދާ ކަމަށެވެ.

މީގެއިތުރުން، ރަސްމާލެއިން ޕްރޮޕަޓީއެއް ގަތުމަކީ އެމީހަކަށް އަދި އޭނާގެ ޢާއިލާއަށް އޮޓޮމެޓިކުން ވިސާ ލިބޭނެ ކަމެއް ނޫންކަންވެސް މިނިސްޓަރު ސާފުކޮށްދެއްވިއެވެ. ވިސާ ދިނުމަކީ އިމިގްރޭޝަންގެ ޤާނޫނުގެ ދަށުން ބަލަންޖެހޭ މިންގަނޑުތަކަށް ބެލުމަށްފަހު މޯލްޑިވްސް އިމިގްރޭޝަނުން ކުރާ ކަމެއް ކަމަށާއި، ވިސާ ދޫކުރުމާއި ކެންސަލްކުރުމުގެ ފުރިހަމަ ބާރު ޤާނޫނީ ގޮތުން އޮންނާނީ ހަމައެކަނި އެ އިދާރާއަށް ކަމަށް ވިދާޅުވިއެވެ.

ދިވެހިރާއްޖޭގެ މިނިވަންކަމާއި އިޤްތިޞާދަށް އަލިއަޅުއްވާލައްވަމުން މިނިސްޓަރު މުއްޠަލިބް ވިދާޅުވީ، ދިވެހި ދައުލަތަކީ ފަޚުރުވެރި މިނިވަން ދައުލަތެއް ކަމަށެވެ. ދިވެހި ދައުލަތް ތަނަވަސްވެ ތަރައްޤީ ވަމުން ދިއުމަކީ ޤައުމުގެ އިސްތިޤުލާލު ވަރުގަދަވެ، އެހެން ޤައުމުތަކުގެ ނުފޫޒުން ސަލާމަތްވެ އޮތުމަށް ކޮންމެހެން މުހިންމު ކަމެއް ކަމުގައި އެމަނިކުފާނު ވިދާޅުވިއެވެ. އަދި ދިވެހި ދައުލަތް މުއްސަނދިވުމަކީ ރާއްޖެއަށް ނުފޫޒު ފޯރުވަން ބޭނުންވާ އެއްވެސް ފަރާތަކުން އެދޭނެ ކަމެއް ނޫން ކަމަށްވެސް ފާހަގަކުރެއްވިއެވެ.

މިނިސްޓަރުގެ ވާހަކަފުޅު ނިންމަވާލައްވަމުން ވިދާޅުވީ، މިއަދު ރާއްޖެއަށް ބޭނުންވަނީ ކުރު މުއްދަތުގެ މަންފާއެއް ނޫން ކަމަށާއި، އަންނަން އޮތް ޖީލުތަކަށް ދެމިގެންދާނެ ފަދަ ތަރައްޤީގެ ބޮޑެތި މަޝްރޫޢުތައް ކަމަށެވެ.