މިނިސްޓަރު ޝިޔާމް، ހއ. ހޯރަފުށީ ކައުންސިލާ ބައްދަލުކުރައްވައިފި

މަސްވެރިކަމާއި ދަނޑުވެރިކަމުގެ ވަޒީރު އަޙްމަދު ޝިޔާމް، މިއަދު ހއ. ހޯރަފުށީ ކައުންސިލާ ބައްދަލުކުރައްވައިފިއެވެ. މި ބައްދަލުވުމުގައި ހޯރަފުށީގެ މަސްވެރިކަމާ ގުޅޭ މުހިންމު މައްސަލަތަކާ ބެހޭގޮތުން މަޝްވަރާކުރެވުނެވެ.

ބައްދަލުވުމުގައި ހޯރަފުށީ ކައުންސިލް ރައީސް މުޙައްމަދު ވަޙީދު ވިދާޅުވީ، މިފްކޯއާއި އަމިއްލަ ފަރާތަކާއި އަދި ކައުންސިލް ހިއްސާވާ އައިސްޕްލާންޓަކީ އެ ސަރަހައްދުގެ މަސްވެރިންނަށް އެންމެ ފަސޭހައިން އައިސް ލިބޭ ޕްލާންޓް ކަމަށެވެ. ނަމަވެސް މިހާރު އެ ޕްލާންޓް ހުއްޓިފައިވާތީ، އެކަން ހައްލުކޮށްދެއްވުމަށް އެދިވަޑައިގަތެވެ. އަދި އެރަށުގެ ދޮށީ ކަނދުފަތި މިހާރު އޮތް ޕޮޒިޝަނަށްވުރެ ރަށާއި ކައިރި ސަރަހައްދެއްގައި އަޅަދިނުމަށްވެސް އެދިވަޑައިގަތެވެ.

މީގެއިތުރުން، ރައީސް ވަޙީދު ފާހަގަކުރެއްވި ގޮތުގައި އޮޑިފަހަރު މަދުވެ މަސްވެރިކަން ދަށްވުމުން، ޒުވާނުން މަދުވެ މަސްވެރިކަން ނެތެމުންދާ ކަމަށެވެ. އެހެންކަމުން މަސްވެރިކަން ކުރިއެރުވުމަށް ވުޒާރާއިން ކުރިއަށް ގެންދިއުމަށް ގެންގުޅުއްވާ ސިޔާސަތަކީ ކޮބައިތޯ ސުވާލުކުރެއްވިއެވެ.

މި ކަންކަމާ ގުޅޭގޮތުން ވަޒީރު ޝިޔާމް ވިދާޅުވީ، ފެނަކައިގެ ދަށުގައި ހުރި އައިސްޕްލާންޓްތައް މިފްކޯއަށް ބަދަލުކުރުމަށް މަސައްކަތް ކުރަމުންދާ ކަމަށެވެ. އަދި މިފްކޯވެސް ހަރުދަނާ ކުރުމަށް މަސައްކަތް ކުރަމުންދާ ކަމަށް ވިދާޅުވިއެވެ. ނަމަވެސް މައްސަލަތައް ހައްލުކުރުމަށް މިފްކޯއަށް ގޮންޖެހުންތައް ހުރިކަމަށާއި، ޓެކްނިކަލް މީހުން މަދުކަމުން މީހުން ބިނާކުރުމަށް ޗައިނާ އަދި އިންޑިއާއިން ފުރުސަތު ހޯދާ އެ މަސައްކަތް ކުރުމުގެ ޕްލޭނެއް އެކުލަވާލަމުންދާ ކަމަށްވެސް ވިދާޅުވިއެވެ.

ވަޒީރު އިތުރަށް ވިދާޅުވީ، ހޯރަފުށީގެ އައިސް ޕްލާންޓް ރަނގަޅު ކުރުމަށް މަސައްކަތް ކޮށްދެއްވާނެ ކަމަށާއި، އައިސް ޕްލާންޓުގެ އޮޕަރޭޝަން ފެށުމަށް ކުރެވެންހުރި ކަންކަން ދެނެގަނެފިވާއިވާކަމަށާއި ވަރަށް އަވަހަށް އައިސްޕްލާންޓްގެ މައްސަލަ ހައްލުކުރުމަށް އެރަށަށް ޓީމެއް ދިއުމަށް ހަމަޖެހިފައިވާކަމަށް ވިދާޅުވިއެވެ. މީގެ އިތުރުން ރަށުގެ މަސްވެރިންނާއި މަޝްވަރާ ކުރުމަށްފަހު، މިހާރުގެ ދޮށީ ކަނދުފަތި ބަދަލުކުރަން ބޭނުންވާ އައު ލޮކޭޝަން ވުޒާރާއާއި ހިއްސާކޮށްދެއްވުމަށް އެދިވަޑައިގަތެވެ.