މިނސްޓަރ ޠާރިޤު އިބްރާހީމް ރަސްމީ ދަތުރުފުޅެއްގައި ފުވައްމުލަކު ސިޓީއަށް ވަޑައިގެންފި

މޫސުމީބަދަލުތަކާ ތިމާވެއްޓާ ހަކަތައާއި ބެހޭ ވުޒާރާގެ ވަޒީރު ޠާރިޤު އިބްރާހީމް މިއަދު ހަވީރު ރަސްމީ ދަތުރުފުޅެއްގައި ފުވައްމުލަކު ސިޓީއަށް ވަޑައިގެންފިއެވެ.

މިއަދު ހަވީރު ފުވައްމުލަކު ސިޓީ އެއަރޕޯޓުން މިނިސްޓަރަށް މަރުހަބާ ދެންނެވީ ފުވައްމުލަކު ސިޓީގެ މޭޔަރ އަލްފާޟިލް އިސްމާއީލް ރަފީޤެވެ.

މި ދަތުރުފުޅުގައި މިނިސްޓަރ ޠާރިޤު އިބްރާހީމްގެ އިތުރުން މިނިސްޓްރީގެ އިސްވެރިންވެސް ބައިވެރިވެ ވަޑައިގަންނަވައެވެ. މި ދަތުރުފުޅުގެ މަޤްޞަދަކީ ފުވައްމުލަކު ސިޓީގައި ހިނގަމުންދާ ތިމާވެށި ރައްކާތެރިކުރުމާއި މޫސުމަށް އަންނަ ބަދަލުތަކާ ގުޅުންހުރި މަޝްރޫޢުތަކުގެ މަސައްކަތް ބައްލަވާލެއްވުމާއި، އަދި އެ ސިޓީގެ ރައްޔިތުންނާ ބައްދަލުކުރެއްވުމެވެ.

މިނިސްޓަރގެ މި ދަތުރުފުޅުގައި ފުވައްމުލަކު ސިޓީގައި ކުރިއަށްދާ ގޮނޑުދޮށް ހިމާޔަތްކުރުމުގެ މަޝްރޫޢުގެ މަސައްކަތް ބައްލަވާލައްވާ، އަދި ސިޓީގެ ކުނި މެނޭޖްކުރުމުގެ ނިޒާމު ހަރުދަނާކުރުމާ ގުޅޭގޮތުން މަޝްވަރާކުރައްވާނެ ކަމަށް ލަފާކުރެވެއެވެ. މީގެ އިތުރުން، ސިޓީގެ ރައްޔިތުންނާއެކު ތިމާވެށި ރައްކާތެރިކުރުމާ ގުޅޭ ބައްދަލުވުމެއް ބޭއްވުމަށްވެސް ހަމަޖެހިފައިވާކަމަށް މަޢުލޫމާތު ލިބިފައިވެއެވެ.