ޓެރަރިޒަމަށް ވާގިވެރިވާ ޤައުމުތަކުގެ ލިސްޓުން ސޫރިޔާ އުނިކުރުމަށް އެމެރިކާއިން ނިންމި ނިންމުމަށް ރާއްޖެއިން މަރުޙަބާ ކިޔައިފި

ޓެރަރިޒަމަށް ވާގިވެރިވާ ޤައުމުތަކުގެ ލިސްޓުން ސީރިއަން ޢަރަބް ރިޕަބްލިކް (ސޫރިޔާ) އުނިކުރުމަށް އެމެރިކާގެ ސަރުކާރުން ނިންމި ނިންމުމަށް ދިވެހިރާއްޖެއިން މަރުޙަބާ ކިޔައިފިއެވެ.

މިކަމާ ގުޅިގެން މިނިސްޓްރީ އޮފް ފޮރިން އެފެއާޒުން ނެރުނު ބަޔާނެއްގައި، މި މުހިންމު ކުރިއެރުމާ ގުޅިގެން ސޫރިޔާގެ ސަރުކާރަށާއި ރައްޔިތުންނަށް ހޫނު މަރުޙަބާއެއް ވަނީ ދަންނަވާފައެވެ. އަދި ސޫރިޔާގެ ރައްޔިތުންނަށް ދެމިއޮންނަ ޞުލްޙަމަސަލަސްކަމާއި، ހަމަޖެހުމާއި، ފާގަތިކަމަށް ރާއްޖޭގެ ސަރުކާރުން ވަނީ އެދިފައެވެ.

ފޮރިން މިނިސްޓްރީގެ ބަޔާނުގައި އިތުރަށް ފާހަގަކޮށްފައިވާ ގޮތުގައި، އެމެރިކާގެ މި ނިންމުމުގެ ސަބަބުން ސޫރިޔާ އަލުން އާރާސްތުކުރުމަށާއި، ޤައުމު ކުރީގެ ޙާލަތަށް ރުޖޫޢަކުރުމަށް ކުރެވެމުންދާ މަސައްކަތްތަކަށް އިތުރު ބާރެއް ލިބިގެންދާނެއެވެ. އަދި މީގެ ސަބަބުން ސޫރިޔާގެ ލޮބުވެތި ރައްޔިތުންގެ ދިރިއުޅުމުގެ ފެންވަރު ރަނގަޅުވެ، އެ ޤައުމުގެ އިޤްތިޞާދަށް އާރޯކަން ލިބިގެންދާނެ ކަމަށް އުއްމީދުކުރާ ކަމަށްވެސް ވިދާޅުވެފައިވެއެވެ.

މީގެއިތުރުން، ސޫރިޔާގެ ސިޔާދަތާއި މިނިވަންކަމާއި އިސްތިޤްލާލް ދެމެހެއްޓުމަށް ރާއްޖެއިން އަބަދުވެސް ތާއީދުކުރާނެ ކަމުގެ ޔަޤީންކަން ސަރުކާރުން ވަނީ ދީފައެވެ. އަދި ސޫރިޔާގެ ރައްޔިތުންގެ ޙައްޤު އުންމީދުތައް ޙާޞިލުކޮށްދިނުމަށްޓަކައި، އެ ޤައުމުގެ އެންމެހައި ފަރާތްތައް ބައިވެރިވާ، ސޫރިޔާގެ އަމިއްލަ އިސްނެގުމުގެ މަތިން ކުރިއަށްގެންދާ ޞުލްޙަވެރި ޙައްލަކަށް ދިވެހިރާއްޖެއިން ފުރިހަމައަށް އެއްބާރުލުންދޭނެ ކަމަށްވެސް އެ ބަޔާނުގައި ބަޔާންކޮށްފައިވެއެވެ.