2026 ވޯލްޑް ކަޕް ބަލައިލުމަށް ހުޅުމާލޭގެ ތިން ސަރަހައްދެއްގައި

2026 ވަނަ އަހަރުގެ ފީފާ ވޯލްޑް ކަޕް ކޮލިފައިން މެޗުތަކާއި ކުރިއަށް ހުރި ބޮޑެތި ފުޓްބޯޅަ މުބާރާތްތަކުގެ ފޯރި ހުޅުމާލޭގައި ދިރިއުޅޭ ރައްޔިތުންނަށް ގެނެސްދިނުމުގެ ގޮތުން، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ޕަބްލިކް ސާވިސް މީޑިއާ (ޕީއެސްއެމް) ގުޅިގެން ހުޅުމާލޭގެ ތިން ސަރަހައްދެއްގައި ބޮޑު ސްކްރީން ބެހެއްޓުމަށް ނިންމައިފިއެވެ.

މި މަޝްރޫޢުގެ ދަށުން ހުޅުމާލޭގައި ސްކްރީންތައް ބެހެއްޓުމަށް ހަމަޖެހިފައިވާ ސަރަހައްދުތަކަކީ:

1. ހުޅުމާލެ ފޭސް 1: ސެންޓްރަލް ޕާކު

2. ހުޅުމާލެ ފޭސް 1: ފްލެޓް 137 ކައިރީގައި ހުންނަ ހެދިކާ ޓެންޓު ސަރަހައްދު

3. ހުޅުމާލެ ފޭސް 2: ވިނަރެސް ޓަވަރު 9 ގެ ކުރިމަތީގައި ހުންނަ ރޯދަ މާރުކޭޓް ޓެންޓު ސަރަހައްދު

މިކަމާ ގުޅޭގޮތުން އެޗްޑީސީން ބުނީ، މިއީ ހުޅުމާލޭގެ ރައްޔިތުންނަށް އެކުވެރި މާހައުލެއްގައި ބޮޑު ސްކްރީނުން މެޗުތައް ބަލައިލުމުގެ ފުރުސަތު ހޯދައިދިނުމަށް ޕީއެސްއެމްއާ ގުޅިގެން ކުރިއަށްގެންދާ ހަރަކާތެއް ކަމަށެވެ. މީގެ މައިގަނޑު ބޭނުމަކީ 2026 ވަނަ އަހަރުގެ ވޯލްޑް ކަޕަށް ކޮލިފައިވުމަށް ކުޅޭ މެޗުތަކާއި، ކުރިއަށް ހުރި ބޮޑެތި މުބާރާތްތަކުގެ ފޯރި ރައްޔިތުންގެ މެދުގައި އިތުރުކޮށް، އިޖުތިމާއީ ގުޅުން ބަދަހިކުރުމެވެ.

މި ހަރަކާތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުޅިވަރަށް ދެއްވާ އަހަންމިއްޔަތާއި، ޒުވާނުންނަށް މުނިފޫހިފިލުވުމުގެ ފުރުސަތުތައް ފަހިކޮށްދިނުމަށް ގެންގުޅުއްވާ ސިޔާސަތުގެ ދަށުން ކުރިއަށްދާ ކަމެކެވެ. ޚާއްޞަކޮށް ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނަށް، ވިނަރެސް ޓަވަރުތައް ކައިރީގައި މިފަދަ ފުރުސަތެއް ލިބިގެންދިއުމަކީ އެ ސަރަހައްދުގެ ދިރިއުޅުމަށް އިތުރު ފޯރިއެއް ގެނުވާނެ ކަމެއް ކަމަށް އެޗްޑީސީން ދެކެއެވެ.

ޕީއެސްއެމް އާއި އެޗްޑީސީ ގުޅިގެން ކުރިއަށްގެންދާ މި މަސައްކަތުގެ ދަށުން، މެޗުތައް ދެއްކުމުގެ ފަންނީ ކަންކަން ކުރިއަށްގެންދާނީ ޕީއެސްއެމްގެ ފަރާތުންނެވެ. މި އިންތިޒާމްތަކުގެ ސަބަބުން ހުޅުމާލެއަކީ ކުޅިވަރުގެ ފޯރިގަދަ، ދިރޭ ސިޓީއަކަށް ހެދުމަށް ސަރުކާރުން ކުރާ މަސައްކަތަށް އިތުރު ބާރެއް ލިބިގެންދާނެއެވެ.