ނުރައްކާތެރި މިޝަން ކާމިޔާބުކުރި ފުލުހުންނަށް ވަޒީރުގެ ހޫނު މަރުހަބާއެއް!
ވ. އަލިމަތާ ކައިރީގައި އޮންނަ ކަނޑު ހޮހަޅައަށް ގެއްލުނު އިޓަލީގެ ޑައިވަރުން ހޯދުމަށް ހިންގި ނުރައްކާތެރި އަދި ކާމިޔާބު ސާޗް އޮޕަރޭޝަންގައި ބައިވެރިވި ފުލުހުންގެ ޑައިވަރުންގެ ޓީމާ، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން އާއި ކޮމިޝަނަރ އޮފް ޕޮލިސް އަޙްމަދު މުޙައްމަދު ބައްދަލުކުރައްވައިފިއެވެ.
އިއްޔެ ކޮމިޝަނަރ އޮފް ޕޮލިސްގެ އޮފީހުގައި ބޭއްވުނު މި ޚާއްޞަ ބައްދަލުވުމުގައި، ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީގެ އިތުރުން ފުލުހުންގެ އެގްޒެކެޓިވް ބައެއް އޮފިސަރުން ވެސް ބައިވެރިވެވަޑައިގެންނެވިއެވެ.
މި ބައްދަލުކުރެއްވުމުގައި ވަޒީރު ޢަލީ އިޙްސާން އާއި ކޮމިޝަނަރ އަޙްމަދު މުޙައްމަދު ވަނީ، ކަނޑުގެ އަޑީގެ އުނދަގޫ ހާލަތްތަކުގައި ފުލުހުންގެ ޑައިވަރުން ދެއްކެވި ހިތްވަރާއި ފަންނީ ހުނަރަށް ނުހަނު ބޮޑަށް ތައުރީފު ކުރައްވާފައެވެ. އަދި މި އޮޕަރޭޝަން ކާމިޔާބުކަމާއެކު ނިންމާލުމުގައި ފުލުހުން ކުރި ބުރަ މަސައްކަތުގެ އަގު ވަޒަންކުރައްވައި، މުޅި ޓީމަށް ވަނީ ސާބަސް ދެއްވާފައެވެ.
މީގެ އިތުރުން، އާންމު ރައްޔިތުންނަށް ޚިދުމަތްކުރުމުގައާއި، ފުލުހުންގެ ޤާނޫނީ ވާޖިބު އަދާކުރުމުގައި މިހާރެކޭވެސް އެއްފަދައިން ސާބިތުކަމާއެކު ދެމިތިބުމަށް ވަޒީރު އިޙްސާން ވަނީ ފުލުހުންގެ ޓީމަށް ހިތްވަރު ދެއްވާފައެވެ.
މި އޮޕަރޭޝަނަކީ ރާއްޖޭގެ ކަނޑުގެ ސަރަޙައްދުގައި ދިމާވި ނުރައްކާތެރި ހާދިސާއެއްގައި، ފުލުހުންގެ ފަންނީ ގާބިލުކަން ސާބިތުކޮށްދިން މުހިންމު މަސައްކަތެއްގެ ގޮތުގައި ވަޒީރު ފާހަގަކުރެއްވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
