ކުންފުނިތަކަށް ފުރުޞަތު ދިނުމަށް "ވިލުންވެށި ގްރާންޓް ޕްރޮގްރާމް" ފުޅާކުރަނީ

"ވިލުންވެށި ގްރާންޓް ޕްރޮގްރާމް" ކުންފުނިތަކަށް ވެސް ބައިވެރިވެވޭނެހެން ފުޅާކުރުމަށް ސަރުކާރުން ރާވަމުންދާ ކަމަށް މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާރޖީ ޢަލީ ޝަރީފް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

"ވިލުންވެށި ގްރާންޓް ޕްރޮގްރާމް" އަކީ އޭޝިއަން ޑިވެލޮޕްމަންޓް ބޭންކް (އޭޑީބީ) އާއި، އެންވަޔަރަންމަންޓް މިނިސްޓްރީގެ އިތުރުން އެސްއެމްއީ ޑިޖިޓަލް ގުޅިގެން ކުރިއަށްގެންދާ މަޝްރޫޢެކެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ޢަލީ ޝަރީފް ވިދާޅުވީ، މި ޕްރޮގްރާމަށް ލިބުނު ބޮޑު ތަރުޙީބަށާއި އެދެވޭ ނަތީޖާއަށް ބަލައި، އަންނަ އަހަރު އިތުރު ޕްރޮޕޯސަލްތައް ހުށަހެޅުމުގެ ފުރުޞަތު ހުޅުވާލާނެ ކަމަށެވެ. އަދި މިހާރު މި ޕްރޮގްރާމް ޚާއްޞަކޮށްފައިވަނީ އަމިއްލަ ފަރުދުންނަށް ކަމަށް ވިޔަސް، ކުރިއަށް އޮތް ތަނުގައި ކުންފުނިތަކަށް ވެސް ފުރުޞަތު ލިބޭނެހެން މި ޕްރޮގްރާމް ފުޅާކުރުމުގެ މަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ.

މި ޕްރޮގްރާމްގެ ދަށުން ހޮވޭ ފަރާތްތަކަށް މާލީ އެހީގެ ގޮތުގައި ގާތްގަނޑަކަށް 6,473.58 ޔޫއެސް ޑޮލަރު ދިނުމަށް ވަނީ ހަމަޖެހިފައެވެ. މިނިސްޓަރު ފާހަގަކުރެއްވި ގޮތުގައި މި ޕްރޮގްރާމް ކުންފުނިތަކަށް ފުޅާކުރުމުގެ މައިގަނޑު މަޤްޞަދަކީ ކުންފުނިތަކަށް މިއަށްވުރެ ބޮޑު މާލީ އެހީތެރިކަމެއް ފޯރުކޮށްދިނުމެވެ. އަދި މި ފުރުޞަތު ފުޅާކުރުމުން އައު އީޖާދީ ޚިޔާލުތަކާއެކު ފަށާ ސްޓާޓްއަޕްތަކަށް މާލީ އެހީތެރިކަމާއެކު އެމީހުންގެ އުފެއްދުންތައް ބާޒާރަށް ނެރުމުގެ ފުރުޞަތު ފަހިވެގެންދާނެ ކަމަށް ވެސް މިނިސްޓަރު ވިދާޅުވިއެވެ.

މިދިޔަ ޖޫން މަހު އިފްތިތާޙުކުރި މި ޕްރޮގްރާމަށް ހުށަހެޅި 150 ޕްރޮޕޯސަލް އިވެލުއޭޓް ކުރުމުގެ މަސައްކަތް މިހާރު ދަނީ ކުރިއަށެވެ. އެ މަސައްކަތް ނިމުމުން، ޕްރޮގްރާމަށް ހޮވޭ ފަރާތްތައް އަންނަ ނޮވެމްބަރު މަހު އިޢުލާނު ކުރާނެ ކަމަށް މިނިސްޓަރު ވިދާޅުވިއެވެ. މި ޕްރޮޕޯސަލްތައް އިވެލުއޭޓް ކުރަނީ އެންވަޔަރަންމަންޓް މިނިސްޓްރީއާއި އެސްއެމްއީ ޑިޖިޓަލް ގުޅިގެންނެވެ.

ސަރުކާރުން ހާމަކުރި ގޮތުގައި ވިލުންވެށި ޕްރޮގްރާމްގެ މައިގަނޑު މަޤްޞަދަކީ މޫސުމަށް އަންނަ ބަދަލުތަކުގެ ނޭދެވޭ އަސަރުތަކުން ތިމާވެށި ރައްކާތެރިކުރުމާއި، ކާބޯތަކެތީގެ ރައްކާތެރިކަން ކަށަވަރުކުރުމަށްޓަކައި ތިމާވެއްޓާ ރައްޓެހި އާދަތައް ކުރިއެރުވުމެވެ. މީގެ އިތުރުން ދެމެހެއްޓެނިވި އައު އީޖާދުތަކާއި ޓެކްނޮލޮޖީގެ ބޭނުން ހިފައިގެން ވަޒީފާގެ ފުރުޞަތުތައް ފަހިކޮށްދިނުމަކީ ވެސް މި ޕްރޮގްރާމްގެ އަމާޒެކެވެ.

ފޯމުތައް އިވެލުއޭޓް ކުރުމުގެ މަރުޙަލާ ނިމުމުން، މި ގްރާންޓް ލިބޭނީ އެންމެ ޤާބިލު 50 ފަރާތަކަށް ކަމަށް ސަރުކާރުން މީގެކުރިން ވަނީ ހާމަކޮށްފައެވެ.