ގދ. ތިނަދޫން ސަބްސިޑީ އަގުގައި މަސްވެރިންނަށް ތެޔޮ ލިބޭނެ އިންތިޒާމް ހަމަޖައްސައިފި

"ފަހި ހަކަތަ" ޕްރޮގްރާމްގެ ދަށުން ރަޖިސްޓްރީވެފައިވާ މަސްވެރި އުޅަނދުފަހަރަށް، ސަރުކާރުން ކަނޑައަޅާފައިވާ ސަބްސިޑައިޒް އަގުގައި ތެޔޮ ލިބޭނެ އިންތިޒާމް ގދ. ތިނަދޫގައި ހަމަޖައްސައިފިއެވެ.

މިނިސްޓްރީ އޮފް އެގްރިކަލްޗަރ އެންޑް އޯޝަން ރިސޯސަސް އިން ހާމަކުރައްވާފައިވާ ގޮތުގައި، މި ނިންމުމަކީ މަސްވެރިންނަށް ތެލުގެ އަގަށް ކުރަންޖެހޭ ހޭދަ ކުޑަކޮށް، މަސްވެރިކަމުގެ ސިނާއަތަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދައިދިނުމަށް ސަރުކާރުން ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ. މި އިންތިޒާމުގެ ދަށުން، ފަހި ހަކަތަ ޕޯޓަލްގައި ރަޖިސްޓްރީވެފައިވާ ހުރިހާ މަސްދޯނިތަކަށް މިހާރު ތިނަދޫން ހެޔޮ އަގުގައި ތެޔޮ އަޅަން ފުރުސަތު ލިބިގެންދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިންގެ ތަރައްޤީއަށް ގިނަގުނަ މަސައްކަތްތަކެއް އަންނަނީ ކުރަމުންނެވެ. އެގޮތުން މަސްވެރިން ބާނާ މަހަށް ދޭންޖެހޭ ފައިސާ ނުދެވި ހުރި ހުރިހާ ބެކްލޮގްތަކެއް ހަލާސްކޮށް، ގަވާއިދުން މަސްވެރިންނަށް ފައިސާ ލިބޭނެ މަގު ފަހިކޮށްދިނުމަކީ މި ސަރުކާރުން އެންމެ އިސްކަމެއްދޭ އެއް ކަންތަކެވެ. މީގެ އިތުރުން، ތެލާއި އައިސްގެ އަގު ހެޔޮކޮށްދިނުމަކީ މަސްވެރިންގެ ޖީބަށް ވަންނަ އާމްދަނީ އިތުރުކުރުމަށްޓަކައި މި ސަރުކާރުން ވެފައިވާ މުހިންމު ވައުދެކެވެ.

"ފަހި ހަކަތަ" އަކީ މަސްވެރި އުޅަނދުފަހަރަށް ބޭނުންވާ ތެޔޮ ކޮންޓްރޯލް ކުރެވިފައިވާ، ހެޔޮ އަގުތަކެއްގައި ފޯރުކޮށްދިނުމަށްޓަކައި ތައާރަފްކުރެވިފައިވާ ނިޒާމެކެވެ. ތިނަދޫގައި މި ޚިދުމަތް ފެށުމާއެކު، ހުވަދު އަތޮޅުގެ ގިނަ އަދަދެއްގެ މަސްވެރިންނަށް ތެޔޮ ހޯދުމުގައި ބޮޑެތި ލުއިފަސޭހަތަކެއް ލިބި، އޮޕަރޭޝަނަލް ޚަރަދުތައް ކުޑަވެގެންދާނެ ކަމަށް މިނިސްޓްރީން އުންމީދު ކުރެއެވެ.

މަސްވެރިކަމުގެ ދާއިރާއިން މަސްވެރިންނަށް ހުރި ތަކްލީފުތައް ނައްތާލައި، އިގްތިސާދީ ގޮތުން މަސްވެރިން ބާރުވެރިކުރުވުމަކީ ރައީސް މުޢިއްޒުގެ ސަރުކާރުގެ ޚާއްޞަ އަމާޒެކެވެ.