ކަނޑުތަކުގެ ދުޅަހެޔޮކަމަކީ ރާއްޖޭގެ މުސްތަޤުބަލާ ގުޅިފައިވާ ކަމެއް: ރައީސް ޑރ. މުޢިއްޒު

ކަނޑުތަކާބެހޭ ޢިލްމު ފުޅާކޮށް، ދެމެހެއްޓެނިވި ގޮތުގައި ކުރެވޭ މަސްވެރިކަން ހަރުދަނާކުރުމާއެކު، ބައިނަލްއަޤުވާމީ އެއްބާރުލުން އިތުރުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ. އެމަނިކުފާނު މިކަމަށް ގޮވާލެއްވީ ދުނިޔޭގެ ކަނޑުތަކުގެ ދުވަހުގެ މުނާސަބަތުގައި ފޮނުއްވި ޚާއްޞަ މެސެޖެއްގައެވެ.

ރައީސުލްޖުމްހޫރިއްޔާގެ މެސެޖުގައި ވިދާޅުވީ، ދިވެހިރާއްޖޭގެ ފަރުތައް ހިމާޔަތްކުރުމާއި، މަސްވެރިކަން ވިލަރެސްކުރުމާއި، މެރިން ސައިންސް ކުރިއެރުވުމަށް ސަރުކާރުން ކުރާ މަސައްކަތްތައް ބިނާކޮށްފައިވަނީ ދިވެހިރާއްޖޭގެ މުސްތަޤުބަލާއި ކަނޑުތަކާ އޮތް ވަރުގަދަ ގުޅުމުގެ މައްޗަށް ކަމަށެވެ. އަދި ދިވެހި ރައްޔިތުންނާއި، އިޤްތިޞާދާއި، ތިމާވެށީގެ ދުޅަހެޔޮކަން ބަރޯސާވަނީ ކަނޑުތަކުގެ ދުޅަހެޔޮކަމުގެ މައްޗަށްކަން އެމަނިކުފާނު ފާހަގަކުރެއްވިއެވެ.

މަސްވެރިކަމުގެ ދާއިރާއަށް އަލިއަޅުއްވާލައްވަމުން ރައީސް ވިދާޅުވީ، ދިވެހިން ކުރާ ދޮށީގެ މަސްވެރިކަމަކީ ޒިންމާދާރުކަމާއެކު ކަނޑުގެ ވަސީލަތްތައް ބޭނުންކުރުމުގެ ދުނިޔޭގެ ނަމޫނާއެއް ކަމަށެވެ. މި ބާވަތުގެ މަސްވެރިކަމަކީ އެހެނިހެން ދިރުންތަކަށް ގެއްލުން ކުޑަ، ކަނޑުގެ މާހައުލީ ނިޒާމު ރައްކާތެރިކޮށްދޭ ވައްޓަފާޅިއެއްކަމަށް އެމަނިކުފާނު ވިދާޅުވިއެވެ.

މޫސުމަށް އަންނަ ބަދަލުތަކުގެ ސަބަބުން ކަނޑުގެ ލޮނުގަނޑު ހޫނުވެ، މުރަކަތައް ހުދުވުމާއި، ގޮނޑުދޮށްތައް ގިރުން ފަދަ ގޮންޖެހުންތައް ކުރިމަތިވަމުންދާ މި ދަނޑިވަޅުގައި، ސައިންސްގެ އަލީގައި ކަނޑުތައް ދެނެގަތުމަކީ ޤައުމީ އަހުމިއްޔަތެއް ދޭންޖެހިފައިވާ ކަމެއްކަމަށް ރައީސް ވިދާޅުވިއެވެ. މިގޮތުން މެރިން ރިސަރޗް ހަރުދަނާކޮށް، ޢިލްމީ ދަލީލުތަކުގެ މައްޗަށް ބިނާކޮށް ނިންމުންތައް ނިންމުމަށް ސަރުކާރުން މަސައްކަތް ކުރައްވަމުންދާކަން އެމަނިކުފާނު ހާމަކުރެއްވިއެވެ.

ރާއްޖޭގެ ރަށްތަކުގެ ފަރުތަކަކީ ޤުދުރަތީ ތަރިކައިގެ މުހިންމު ބައެއްކަން ފާހަގަކުރައްވައި، ފަރުތަކުގެ ސިއްޙަތު ބެލެހެއްޓުމާއި މުރަކަ އާލާކުރުމުގެ ދިރާސާތައް ފުޅާކުރުމަށް ސަރުކާރުން އިސްކަންދޭނެކަމަށް ރައީސް ވިދާޅުވިއެވެ.

ބައިނަލްއަޤުވާމީ މައިދާނުގައި ކަނޑުތައް ބެލެހެއްޓުމުގެ މުހިންމުކަމާ ބެހޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ކަނޑުތަކުގެ މުސްތަޤުބަލަކީ އެއް ޤައުމަކަށް އެކަނި ކަށަވަރުކުރެވޭނެ ކަމެއް ނޫން ކަމަށެވެ. އެހެންކަމުން، ޖަޒީރާ ޤައުމުތަކުގެ ބޭނުންތަކަށް ރިއާޔަތްކޮށް، އެކަމަށް ބޭނުންވާ އެއްބާރުލުން ދިނުމަށް ބައިނަލްއަޤުވާމީ މުޖުތަމަޢަށް އެމަނިކުފާނު އިލްތިމާސްކުރެއްވިއެވެ.

ދުނިޔޭގެ ކަނޑުތަކުގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައިވެސް ވަނީ، ކަނޑުތައް ހިމާޔަތްކުރުމުގައި މުޅި ދުނިޔެ ގުޅިގެން އާ ޢަޒުމެއްގައި މަސައްކަތްކުރުމަށް ގޮވާލައްވާފައެވެ.