އެމްޖެންސީ މެޑިސިން ޑޭ ފާހަގަކުރުމަށް އާޓިފިޝަލް ބީޗުގައި ޚާއްސަ ފެއާއެއް ބާއްވަނީ

މިއަހަރުގެ ބައިނަލްއަޤުވާމީ އެމްޖެންސީ މެޑިސިން ޑޭ ފާހަގަކުރުމުގެ ގޮތުން، އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) އިން އިންތިޒާމުކުރާ ޚާއްސަ "އެމްޖެންސީ ފެއާ" އެއް ބޭއްވުމަށް ނިންމައިފިއެވެ.

މި ފެއާ ބޭއްވުމަށް ހަމަޖެހިފައިވަނީ މި މަހުގެ 5 ވާ ބުދަ ދުވަހު މާލޭ އާޓިފިޝަލް ބީޗުގައެވެ. ހަވީރު 4:00 އިން 6:00 އަށް ކުރިއަށްދާ މި ހަރަކާތަކީ ކުއްލި ފަރުވާގެ ދާއިރާގައި މަސައްކަތްކުރާ ފަރާތްތަކުގެ އަގުވަޒަންކުރުމާއި، ކުއްލި ހާލަތްތަކުގައި އަމަލުކުރާނެ ގޮތްތަކާ މެދު އާންމުން ހޭލުންތެރިކުރުވުމުގެ މަގްސަދުގައި ބާއްވާ ހަރަކާތެކެވެ.

އައިޖީއެމްއެޗުން މައުލޫމާތު ދޭ ގޮތުގައި، މި ފެއާގައި އެމްޖެންސީ ސާވިސްތަކުގެ މަސައްކަތްތައް ދައްކައިދޭ ލައިވް ޑެމޮންސްޓްރޭޝަންތައް ކުރިއަށްދާނެއެވެ. މީގެ ތެރޭގައި މީހެއްގެ ފުރާނަ ސަލާމަތްކުރުމަށް އެންމެ މުހިންމު އެއް ކަންތައް ކަމުގައިވާ ސީޕީއާރު ދޭނެ ގޮތް ދަސްކޮށްދިނުމުގެ ޚާއްސަ ސެޝަންތައް ހިމެނެއެވެ.

މީގެ އިތުރުން، ކުޑަކުދިންނާއި ބޮޑެތިމީހުންނަށް ބައިވެރިވެވޭނެ ތަޢުލީމީ އަދި މުނިފޫހިފިލުވުމުގެ އެކި ހަރަކާތްތަކާއި، ހަދިޔާ ދިނުމުގެ އިންތިޒާމުވެސް މި ފެއާގެ ތެރެއިން ވަނީ ހަމަޖެހިފައެވެ. އަދި ކުއްލި ފަރުވާގެ ދާއިރާގައި ހަރަކާތްތެރިވާ "ބަތަލުން" ނާ ބައްދަލުކޮށް، އެފަރާތްތަކުގެ މަސައްކަތްތަކާ ބެހޭ މައުލޫމާތު އޮޅުންފިލުވުމުގެ ފުރުސަތުވެސް އާންމުންނަށް ލިބިގެންދާނެއެވެ.

އައިޖީއެމްއެޗުން ވަނީ އާއިލާ އާއި ރައްޓެހިންނާއެކު ވީހާވެސް ގިނަ ބަޔަކު މި ފެއާގައި ބައިވެރިވެ، މުހިންމު މައުލޫމާތުތަކެއް އުނގެނުމަށް ދައުވަތު އަރުވާފައެވެ. މިއީ ކޮންމެ މީހަކަށްވެސް ދިމާވެދާނެ ކުއްލި ހާލަތަކަށް ތައްޔާރުވުމަށް ލިބިގެންދާ ރަނގަޅު ފުރުސަތެއް ކަމަށް އެ ހޮސްޕިޓަލުން ފާހަގަކުރެއެވެ.