މައްސަލަ ހުރިކަން އެނގި ތިބެ އައްޑޫ ކައުންސިލުން ޕިކަޕަކަށް ތިން ލައްކައަށްވުރެ ގިނަ ރުފިޔާ ޚަރަދުކޮށްފި

އައްޑޫ ސިޓީ ކައުންސިލުން ހިތަދޫ އަވަށުގެ މުނިސިޕަލް ޚިދުމަތްތަކަށް ބޭނުންވާ ޕިކަޕެއް ގަތުމުގައި، އެ އުޅަނދަކީ މައްސަލަ ހުރި އެއްޗެއްކަން އެނގި ތިބެ ދައުލަތުގެ މާލިއްޔަތު ގަވާއިދާ ޚިލާފަށް ބޮޑު ޚަރަދެއް ކޮށްފައިވާކަން އޮޑިޓް އޮފީހުގެ ރިޕޯޓުން ހާމަވެއްޖެއެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުން، މި ޕިކަޕް ހޯދުމަށް ފުރަތަމަ ކުރި އިޢުލާނާ ގުޅިގެން 395,000 ރުފިޔާއަށް ގެނައި އުޅަނދުގައި ގިނަ މައްސަލަތަކެއް ހުރުމުން އެ އެއްބަސްވުން ބާޠިލުކުރިއެވެ. ނަމަވެސް، ދެވަނަ ފަހަރަށް ކުރި އިޢުލާނާ ގުޅިގެން 345,000 ރުފިޔާއަށް ޕިކަޕް ސަޕްލައިކުރަން ހުށަހެޅި ފަރާތުގެ ލިޔެކިޔުންތަކުން، އެއީ ކުރިންވެސް މައްސަލަ ހުރެގެން އަނބުރާ ފޮނުވާލި ޕިކަޕްކަން އެނގެން އޮތްއިރުވެސް ކައުންސިލުން ވަނީ އެކަން ބަލައިގެންފައެވެ.

މި އުޅަނދާ 15 މާރިޗު 2024 ގައި ކައުންސިލުން ހަވާލުވީ އެއްވެސް އިންސްޕެކްޝަނެއް ހެދުމަކާ ނުލައެވެ. އޭގެ 12 ދުވަސް ފަހުން ހެދި އިންސްޕެކްޝަނުން، އެއީ މުނިސިޕަލް މަސައްކަތްތަކަށް އެކަށީގެންނުވާ އަދި ގިނަ މައްސަލަތަކެއް ހުރި އުޅަނދެއްކަން ކަށަވަރުވިއެވެ. އެ މައްސަލަތައް އިޞްލާޙުކުރުމަށް އެންގުމުން ބަދަލުގައި ގެނައި ޕިކަޕުގައިވެސް ގިނަ އުނިކަންތައްތަކެއް ހުރިކަން އިންސްޕެކްޝަނުން ވަނީ ދައްކާފައެވެ.

އޮޑިޓް އޮފީހުން ބުނިގޮތުގައި، މި މައްސަލަތައް ޙައްލުނުކޮށް އަދި ލަސްވުމުގެ ސަބަބުން އުނިކުރަންޖެހޭ ފައިސާ އުނިކުރުމެއް ނެތި، 2 ޖުލައި 2024 ގައި އެއްބަސްވުމުގެ މުޅި ޖުމުލަ އަގު ކަމަށްވާ 345,000 ރުފިޔާ ވަނީ ކޮންޓްރެކްޓަރަށް ދޫކޮށްފައެވެ.

މީގެ އިތުރުން، ފައިސާ ދޫކުރުމަށްފަހު 30 ޖުލައި 2024 ގައި ހިތަދޫ އަވަށު އޮފީހާ ޕިކަޕް ހަވާލުކުރިއިރުވެސް އޭގައި ގިނަ މައްސަލަތަކެއް ހުރިކަން އެ އޮފީހުގެ ރިޕޯޓުން އެނގެން އޮތް ކަމަށް އޮޑިޓްގައިވެއެވެ. މިއީ ދައުލަތުގެ މާލިއްޔަތު ގަވާއިދުގެ 10.64 ވަނަ މާއްދާއާ ކަނޑައެޅިގެން ޚިލާފަށް ހިންގާފައިވާ މުޢާމަލާތެއްކަން އޮޑިޓް ރިޕޯޓުގައި ވަނީ ފާހަގަކޮށްފައެވެ.